Shqipëria me Ramën, një serë hashashi në mes të Europës – Nga Artan Cena

Shqipëria me Ramën, një serë hashashi në mes të Europës – Nga Artan Cena

Deri më tani jemi etiketuar si ‘Kolumbia e Europës’, por tani pritet që ta marrim në mënyrë zyrtare këtë emër. Sot Edi Rama bëri atë që pritej prej kohësh. Shpalli faktin se shqiptarët duan që të legalizojnë kanabisin. E vërteta është se kjo ka qenë një dëshirë e hershme e tij. 

Pasi e kanabizoi Shqipërinë, duke lejuar kultivimin e hashashit me leje nga lart, Rama ka vazhduar me projektin e tij për legalizimin e drogës në vend. Sigurisht duke e maskuar si drogë për qëllime mjekësore, Rama ka vendosur që të marrë në dorë këtë industri që sigurisht sjell të ardhura të larta. 

E në këto kohëra të vështira ekonomike dhe kriza të njëpasnjëshme, ishte fiks koha kur Rama të nxirrte në skenë ‘shpëtimin’ e ekonomisë së shqiptarëve edhe njëherë me kanabisin.

‘Do të legalizojmë kanabisin dhe do hapim një front të ri pune dhe rritje ekonomike, përveç rritjes së aspektit teknologjik, ç’ka kanë thënë qytetarët, do të realizohet’, tha Edi Rama, kur shpalli fitoren e tij. Se sa i besueshëm është një sondazh i kryer nga qeveria, kuptohet që në fillim të kësaj nisme.

Si për të kënaqur opozitarët, Rama e nisi strategjinë e tij duke thënë se, shqiptarët ishin kundër vaksinimit të detyrueshëm e pak më vonë, do të shpallte dhe fitoren e tij, të kanabisit. Që kur ka ardhur në pushtet në 2013, historia e Ramës ka qenë e lidhur pazgjidhshmërisht me drogat, ndoshta edhe si një hobi i tij apo i njerëzve pranë tij, por në çdo raport ndërkombëtarësh, Shqipëria është cilësuar si vend origjine e kanabisit, si bazë për kalimin e drogave të forta drejt Europës, si vendi ku pastrohen paratë e drogës që shitet nëpër vende të ndryshme.

Nga ana tjetër, Edi Rama nuk i ka pranuar asnjëherë këto akuza, i ndihmuar edhe nga ambasadorë të ndryshëm të ardhur në Tiranë, të cilët kanë mbyllur sytë kur kanabisi po pëlciste në çdo cep të Shqipërisë, dhe kanë heshtur kur raportet e DASH, thonin se vendi ynë ishte kthyer në një parcelë të madhe kanabisi.

Por tani nga parcelat e hapura të kanabisit, Edi Rama po kërkon ta kthejë Shqipërinë në serën e legalizuar të kanabisit në vend.

Si zakonisht, Rama në mungesë të vizionit qeverisës dhe ndërtimit të një ekonomie të drejtë, e kërkon shpëtimin në ekonominë e zezë të drogës, që siç thotë ai do të hapë vende të reja pune, por në fund pritet të marrë edhe dhjetëra jetë njerëzisht, siç ka ndodhur në 9 vitet e qeverisë së tij.

administrator

Related Articles

Leave a Reply

Your email address will not be published.