By Organizata Botërore e Shëndetësisë (OBSH) ka kritikuar disa vende europiane për lehtësimin e “menjëhershëm” të masave kufizuese të Covid-19.
Sipas OBSH-së, numri i rasteve të reja me Covid-19 vazhdon të jetë në rritje në 18 nga 53 vendet e rajonit.
Dr. Hans Kluge, Drejtori i OBSH-së për Europën, tha se ai ishte “vigjilent” për situatën aktuale të pandemisë në kontinent, por mbetej “optimist”.
“Vendet ku po vihet re një rritje e veçantë e rasteve të reja janë Mbretëria e Bashkuar, Irlanda, Greqia, Qiproja, Franca, Italia dhe Gjermania”, tha Kluge në një konferencë për shtyp në Moldavi.
“Këto vende i kanë hequr kufizimet në mënyrë të menjëhershme, duke shkuar nga masat e tepruara kufizuese, tek ato të pamjaftueshme”, shtoi ai.
Sipas të dhënave të OBSH-së, numri i infektimeve të reja në Europë kishte rënë shumë pas fundit të janarit, por ka filluar të rritet përsëri që nga fillimi i marsit.
Epidemiologët kanë fajësuar për rritjen e rasteve të reja edhe nën-variantin e ri të Omicron, BA.2, i cili është rreth 30% më infektues, por jo më i rrezikshëm.
Në shtatë ditët e fundit, OBSH ka regjistruar për Europën më shumë se 5.1 milionë raste të reja dhe 12,496 humbje jete.
Megjithatë, Kluge vuri në dukje se “ka një nivel shumë të lartë të imunitetit” kundër virusit për shkak të shkallës së vaksinimeve dhe infektimeve të mëparshme.
“Do të na duhet të jetojmë me Covid edhe për disa kohë, por kjo nuk do të thotë se nuk mund të shpëtojmë nga pandemia”, tha ai.
OBSH u ka bërë thirrje qeverive europiane që të vazhdojnë të mbrojnë “qytetarët më vulnerabël” dhe të ofrojnë akses te medikamentet e reja antivirale për më shumë vende të tjera./MONITOR
