By Sulmi brutal rus ndaj një vendi të pavarur dhe të njohur ndërkombëtarisht ka tronditur nga themelet jo vetëm të sulmuarin dhe sulmuesin por edhe të gjithë planetin.
Një superfuqi ushtarake që i është qepur prej më shumë se 4 ditësh rrugëve e fshatrave te Ukrainës për të nënshtruar një popull të tërë ka hasur në një rezistence të pashoqe nga ushtria e këtij vendi dhe populli i vet.
Edhe pse e gjithë bota u dha mbështetje morale në ditën e parë të sulmit Ukrainasit nuk e ulën kokën përballë “armëve atomike” të Rusisë por morën armët dhe nisën përballjen në të gjithë frontet dhe në të gjithë anët nga u sulmua toka e tyre.
Në krye te kësaj lufte të pashoqe u vu me zë dhe me figurë Presidenti i Ukrainës. Një i ri 44 vjeçar, ish aktor humori i cili po tregon një udhëheqje prej lideri në një kohë krize të tillë, ku jeta është në fije të perit. Një njëri i guximshëm.
Një politikan i pavarur që preambul të evolucionit të tij politik në Ukrainë kishte frazën “në shërbim të popullit” po shkund nga themelet perandorinë e armatosur rëndë të rusisë. Ishte një aktor humori shumë popullor që zgjodhi ti jepte drejtim punëve të vendit të tij dhe mori një mbështetje të madhe popullore çka e çuan të jetë President në një moment ndoshta më të vështirin e kombit të vet që nga krijimi i nocionit të shteteve dhe kombeve.
Ai nuk ka frikë. Të paktën ka ditur ta fshehë dhe popullit të tij ka ditur t’i japë kurajo e ta nxisë që të mos nënshtrohet pa u përballur. Gratë dhe burrat e Ukrainës po luftojnë ditë e natë, në kufi, në rrugë, në fshat e qytet dhe po përballen me një armatë nga më të mëdhatë e botës.
Mësimi për njerëzimin është i madh. Putin e kishte menduar se do ta pushtonte në pak orë Ukrainën por siç duket dëshira e madhe për liri dhe integrim e Ukrainasve po i bën varrin. Me qëndrimet e tyre edhe Evropa dhe SHBA mendonin të njëjtën gjë si Putini që brenda pak orësh Ukraina do binte. Dhe siç duket ata kishin bërë gati agjendën e bisedimeve me Putinin për të ardhmen e Ukrainës. Agjendë qe dikush ua prishi dhe ua rrëzoi bashkë me videot e montuara, gati.
Dhe njeriu që po e bën ketë është Volodymyr Zelenskyy, Presidenti i Ukrainës i cili bashkë më familjen e tij nuk e braktisi për asnjë moment Kievin edhe pse iu ofruan shumë opsione edhe nga BE edhe nga SHBA. Një njëri me një karakter të fortë. Një qytetar i denjë për postin që mban. Një ukrainas bio që para gjithçkaje tjetër vuri kombin e tij dhe vendin e tij.
I rrethuar nga të gjithë anët ai nuk e humbi qetësinë por diti t’u japë përgjigje të gjithë qëndrimeve. Kur tha se të gjithë kishin frikë nga Rusia dhe u përball i vetëm, u bëri një leksion të hidhur evropianëve por sidomos socialisteve që janë në pushtet në SHBA e që siç duket kanë mbyllur paksa njërin sy për të mos reaguar në kohë që të ndalnin komunistin Putin në sjelljen e tij arrogante dhe të çmendur.
Leksioni që i erdhi botës LIVE nga Ukraina nuk ka nevojë për shumë komente. Por duhet thënë se Humoristi President. i tregoi Presidentit politikan të SHBA-së Biden, se ka diçka më të mirë se muhabeti, e kjo është të duash vendin tënd. I tregoi Boris Johnsonit se ka diçka më të mirë se kërcënimet dhe që është lufta për vendin tënd. I tregoj Emanuel Macronit se ka diçka më të shenjtë se demokracia, që është mbrojtja e vendit tënd nga pushtimi barbar. I tregoi kancelarit gjerman Olaf Scholz se ka diçka më të madhe se ngrohja e duarve nga gazi rus, e ajo është liria e kombit tënd.
U tregoi te gjithëve diçka që kur je në të drejtën e natyrës gjithçka mund të ndodh por do jesh i qetë gjithmonë, edhe i gjallë edhe i vdekur. Humoristi ukrainas që po i kthen botës seriozitetin, ka nevojë për ndihmë ushtarake. Dhe bota e qytetëruar nuk duhet të ja kursejë që në ditët e mëvonshme të mos bëhet pishman e bota të qajë kufomat. Kështu njerëzimi të mos ngelet me sytë nga televizori në pritje të ndonjë deklarate apo ndonjë imazhi me shpërthim nuklear. Situata është shumë serioze vlerësojnë analistët ushtarakë dhe më mirë se askush po reagon Presidenti Ukrainas. Një leksion atdhedashurie për njerëzimin. Mos e braktisni.
