By Toronto-Kanada
Prej pothuaj 20 vitesh Liljana Vaso është vendosur në Toronto të Kanadasë. E diplomuar për inxhinieri ndërtimi në Tiranë, profesioni i saj ka qenë tëpër i lidhur me urbanistikën dhe prioritetet e ndërtimeve të reja në qytet. Por duke dashur tënjohë më nga afër edhe stilistikën e ndërtimit, diploma në arkitekturë i ka dhënë shansin të vlerësojë në një tjetër nivel edhe më profesional qytetet e ndryshme që ajo viziton.
Danimarka ka qenë një eksperiencë në kohën e vendin e duhur për t’i dhënë më tepër akses karrirrës. Duke investuar në një vend europian, Liljana është njohur më nga afër edhe me kërkesat e punës në tregun botëror.
Pas Danimarkës, Kanadaja ka qenë destinacioni përfundimtar për t’u ngulur gjatë në Amerikën e Veriut. Të dëshiruar që fëmijët të kishin fëmijëri të bukur dhe të ardhme të sigurtë, familja Vaso vendosi përfundimisht jetesën këtu.
Me një raport të ngushtë me komunitetin shqiptar, Liljana herë pas herë është aty për të mbështetur investimin shqipfolës edhe në provincën e Ontarios. Në kaq kohë emigrimi, Liljana rendit faktorët që e kanë ndihmuar të rrisë karrierën e saj profesionale falë edhe këmbënguljes.
Në një intervistë për Albanian Montreal Press, Liljana do të na tregojë më tepër për profesionin dhe jetën e saj në Toronto.
Pas kaq vitesh në Toronto, si ka ndryshuar jeta juaj?
Pas pothuaj 20 vite jete në Kanada, e them me shumë dëshirë që është atdheu im i dytë. Fillimet tona nuk kanë qenë aspak të lehta, integrim jo fort i kollajtë fizikisht dhe psikologjikisht. Në Shqipëri përveç familjes time gjithashtu lashë pas një karrierë të suksesshme. Asgjë më shumë nuk gjeta veçse një familje të vogël mikpritëse. S’do të isha e sinqertë nëse nuk do të flisja fillimisht për dimrin e parë, sfidat me motin dhe temperaturat, pastaj socializimi shoqëror, integrimi profesional si dhe mjaft të tjera kanë qenë një sfidë e përditshme vitet e para te emigrimit në Kanada. Gjithsesi vazhdimësia e shkollimit, puna e palodhur, këmbëngulja, vendosmëria, përkushtimi kanë bërë të kem një karrierë të realizuar dhe një jetë shumë të mirë. Kam shumë vite që punoj broker në shitblerje pasurish. E dua punën që bëj dhe për arsye të biznesit njihem me familje të komunitetit shqiptar, kam mundësinë dhe shansin të takoj dhe punoj me njerëz nga komunitete të tjera ku mësoj gjëra të reja edhe nga kulturat e tyre. Mund të them që emigrimi më ka bërë më të fortë, më të dashur dhe me ka rritur profesionalisht në punën e përditshme. Mendoj se të gjitha qëllimet dhe projektet që i kam vënë vetes deri tani, i kam arritur.
Ju jeni inxhiniere ndërtimi njëkohësisht edhe arkitekte, në syrin tuaj cili qytet kanadez ka urbanistikë më të bukur?
Po është e vërtetë, unë jam diplomuar për inxhinieri ndërtimi dhe arkitekturë nga Universiteti i Tiranës, gjithashtu një master për ndërtim në Danimarkë. Qytetet dhe ndërtesat i shikoj shumë nga ana arkitektonike dhe urbanistike. Jam fanse e arkitekturës dhe urbanistikës europiane. Qyteti më i bukur për mua në Kanada është qyteti i vjetër i Quebec, i cili është i mbrojtur nga UNESCO si një trashëgimi botërore. Ndërtesat e shekullit të 18-19, rrugët e ngushta, katedralet dhe kafet e bukura më përngjajnë me Europën.
Pas kaq vitesh në profesion, pse ndërruat karrierë?
Pyetje e bukur. Unë vërtet punoj Real Estate Broker për shumë vite dhe e bëj me shumë pasion dhe dashuri, por nuk e kam lënë profesionin. Unë ende vazhdoj të bëj projekte arkitekture dhe jo vetëm për në Kanada por edhe për në Shqipëri. Janë disa projekte inxhinierike që më japim mundësinë ta vizitoj edhe më shpesh atdheun tashmë për arsye profesionale.
Si e shfrytëzoni internetin dhe mediat sociale për të tërhequr tregun?
Mediat sociale janë bërë pjesë integrale e jetës së përditshme dhe kanë efekt taktik në tërheqjen e klientëve. Në ditët e sotme prezenca online është një pjesë strategjike e marketimit. Postimi i shtëpive për shitje dhe i shtëpive të blera, komunikimi me klientet, video të ndryshme të krijojnë një prezencë online. Një strategji e fortë në social media të ndihmojnë për të krijuar këtë prezencë online dhe rrjedhimisht për të tërhequr shitës dhe blerës.
Cila është mënyra për të qëndruar të organizuar dhe të siguroheni që të mos humbisni asnjëherë një takim apo të mbërrini vonë?
Në natyrën time jam shumë korrekte me takimet dhe këtë e kam të edukuar shumë herët në karakterin tim. Babai im ka qenë me rregulla të forta përsa i përket korrektësisë dhe takimit në kohë me njerëzit dhe këtë e ka përcjellë tek unë. E kam pjesë të karakterit dhe nuk lodhem fare për këtë. Kurrë nuk kam humbur asnjë takim. Jam shumë e organizuar me kohën. Kam një agjendë ku mbaj të gjitha takimet e cila m’i kujton ato pothuaj 24 orë më herët.
Ju keni sponsorizuar mjaft aktivitete brenda komunitetit në Kanada, sipas jush si po ruhen traditat shqiptare në Diasporë?
Po e vërtetë, unë kam sponsorizuar aktivitete të ndryshme të komunitetit në Kanada. Njëri prej tyre që me të vërtetë ka tërhequr vëmendjen time është Marlee Got Talent. Është një aktivitet, ku organizatorja Ina Xoxa punon me shumë përkushtim me këta fëmijë për të ruajtur gjuhën dhe kulturën shqiptare. Është kënaqësi e madhe kur sponsorizon për këta fëmijë dhe lumturohesh kur i shikon duke kënduar këngët dhe kërcyer vallet tona.
Sipas meje është bërë punë e mirë nga shoqata të ndryshme shqiptare në Kanada për të ruajtur gjuhën dhe zakonet, pavarësisht se pandemia i ka ndërprerë takimet fizike. Shpresojmë që situata të kthehet plotësisht në normalitet sa më shpejt dhe të fillojë jeta.
A keni ju një mesazh për të rinjtë që emigrojnë në Kanada?
Po kam, punoni pa u lodhur, me devotshmëri dhe mos u trembni nga sfidat për të arritur qëllimet dhe synimet tuaja. Kanadaja është vend i mundësive, puna e palodhur gjithmonë është e shpërblyer.
Bisedoi: Blerina Ruka
.
