By Sot, si askund në botë, ditën e dielë, në të cilën familjet janë në kërkim të qetësisë se merituar, kryeministri i Shqipërisë del dhe proklamon afrimin e një krize të padëgjuar dhe të pa-precedent e cila do të përballë qytetarët “me çmime marramendëse”.
Megjithëse tregjet ndërkombëtare kanë luhatje të theksuara në çmimet e energjisë, nuk më rezulton që ndonjë lider botëror të ketë vënë gjëmën dhe të ketë dalë të lajmërojë qytetarët e vet për “apokalipsin” e pritshëm ekonomik dhe energjitik që i pret. Krahasimi i krizës së supozuar energjitike me tërmetin apo pandeminë ështe jo vetëm jo-serioz por edhe gati-gati dashakeqës. Largpamësi e Kryeministrit? Absolutisht jo, thjeshtë dhe vetëm shqipërim i filozofsë me të cilën qeveriset vendi prej shumë kohësh tashmë.
Fajin për atë që na pret e ka gjithmonë dikush apo diçka! Aty ku ju dhemb më shumë, në rrasht, aty priteni t’ju bjerë dhe kjo flamë!A ka shqiptar që nuk drithërohet kur i përmendet ngrohja në dimër? Dihet se ngrohja është një nga sprovat më të vështira me të cilat përballet vendi. Me pak fjalë, bëni gati batanijet, jorganët dhe bluzat e trasha se zor se do keni mundësi të ngroheni me të tjera mënyra sivjet.
Aty ku dhemb, aty do ta pësoni!A ka shqiptar që nuk drithërohet kur i përmendet shkëputja e energjisë? Dihet se ndërpreja e energjisë ka qenë dhe është një problem sistemik i vendit. Si mundet kryeministri të shqipërojë fjalë rreth paralajmërimeve për ndërprerje energjie në prag të dimrit?
Aty ku djeg, aty do ta pësoni!A ka shqiptar që nuk drithërohet nga rritja e pa-kontrolluar e çmimeve, duke filluar nga shporta bazë? Cili lider del dhe u thotë qytetarëve të vet që do përballeni me rritje marramendëse çmimesh? Aty ku ju dhemb, në rrasht!
A ka shqiptar që nuk drithërohet nga termeti dhe pandemia? Ky na thotë se kjo që na pret qenka së paku njësoj si fatkeqësitë e tjera që na kanë rënë mbi kokë, ndoshta dhe më keq. Thika në palcë, me pak fjalë.
Pyes veten, nëse vendi qenka kaq i ekspozuar dhe i pafuqishëm ndaj apokalipsit që na pret, përse na duhet kryeministri? Megjithatë, ftoj ekonomistët të shprehin mendime rreth argumenteve të perdorura. Personalisht nuk i gjej serioze deklarimet se acari dhe rebeshet e dimrit të kaluar në hemisferën veriore dhe në Azi, si dhe ngricat në ShBA kanë ndikuar ofertën dhe kërkesën e sotme për gaz. Më duken argumente krejt boshe dhe pa pikë serioziteti. Për mua këto deklarata janë thjeshtë një prelud për dështimet e gjithanshme që na presin.
Veçse këtë herë, fajin do ta ketë “gazi”!
