By Regjistrimi i popullisë së Maqedonisë së Veriut ka një domethënie tepër të lartë për shqiptarët e RMV. Regjistrimi i popullsisë do të zgjasë deri më datë 30 shtator. Datat paraprake ishin 1-21 prill, por për shkak të situatës së pandemisë ajo ka njohur data të reja deri në fund të muajit shtator.
Më 2 prill, Kuvendi i Maqedonisë së Veriut miratoi ndryshimet ligjore për të shtyrë regjistrimin nga muaji prill në shtator.
Krahas qytetarëve që jetojnë brenda kufijve, mundësitë e aplikimit për regjistrimi mund të kryhen edhe në platforma online, ndërkohë që i njëjti apel bëhët për personat që kanë vendqëndrim jashtë Republikës së Maqedonisë së Veriut. Përveҁ regjistrimit të popullisisë, operacioni statistikor do të përfshijë edhe të dhëna apo karakteristikat e përcaktuara demografike, arsimore, ekonomike dhe sociale të popullsisë.
Në një komunikim telefonik për Albanian Montreal Press, Konsulli i Përgjithshëm i Republikës së Maqedonisë së Veriut në Toronto të Kanadasë, z. Ilir Islami vuri theksin e nxitjes së dëshirës për të gjithë bashkëatdhetarët për t҆iu bashkuar nismës. Po ashtu, nëpërmjet një deklarate për media i ka bërë thirrje komunitetit shqiptar në Kanada për regjistrim në censusin kombëtar, si më poshtë:
REGJISTRIMI VAZHDON –DIASPORA REGJISTROHET DERI MË 30 SHTATOR
Të nderuar qytetarë të Maqedonisë së Veriut, regjistrimi i popullatës ka hyrë në fazën përfundimtare ku pa përjashtim të gjithë Ju duhet të bëheni pjesë e këtij procesi të rëndësishëm që përfundon më 30 shtator. Sipas Ligjit për regjistrimin e popullsisë, shtetasit e lindur në Maqedoninë e Veriut por që jetojnë më shumë se një vit jashtë vendit kanë mundësinë e regjistrimit online. Me aktin tuaj të regjistrimit, përmes një angazhimi fare të vogël, Ju ia bëni shërbimin më të madh vendit tuaj, andaj të dashur qytetarë, Ju bëjmë thirrje gjithsecilit prej jush, REGJISTROHU!
Ky është linku i aplikacionit ku duhet të regjistroheni vetë duke e plotësuar online formularin: https://census.stat.gov.mk/al/
Kini kujdes, numri amëz apo numri personal është thelbësor, – atë e gjeni te pasaporta juaj, te letër-njoftimi apo te çertifikata e lindjes!
Regjistrohuni sa më parë, si dhe njoftoni të afërmit dhe miqtë tuaj të cilët mbase mund të jenë të painformuar!”
Regjistrimi i fundit i popullsisë në Maqedoninë e Veriut, është bërë në vitin 2002. Atë vit nisi regjistrimi i popullsisë, por disa ditë para përfundimit dështoi për shkak të mosmarrëveshjeve politike, që kishin të bëjnë me metodologjinë, përkatësisht regjistrimin e diasporës. Referuar po këtij censusi, Maqedonia e Veriut numëron afro dy milionë banorë, prej tyre afër gjysmë milioni apo 25. 17 për qind janë shqiptarë.
Sipas shifrave zyrtare të Census 2002, vendi numëronte 2.022.547 banorë ndërsa struktura etnike e popullsisë ishte: maqedonas – 1.297.981 (64.18 për qind), shqiptarë – 509.083 (25.17 për qind), turq – 77.959 (3.85 për qind), romë – 53.879 (2.66 për qind) serbë – 35.939 (1.78 për qind), boshnjakë – 17.018 (0.84 për qind), vllahë – 9.695 (0.48 për qind), të tjerët – 20.993 (1.04 për qind).
