By TORONTO, KANADA – Një tjetër emër shqiptar shënon një arritje të rëndësishme në botën akademike ndërkombëtare. Studiuesja shqiptare Dr. Kozeta Miliku është emëruar në pozicionin prestigjioz “Canada Research Chair in Nutrition and Child and Youth Health”, një nga vlerësimet e rëndësishme të Kanadasë për studiuesit me arritje të spikatura dhe potencial të lartë shkencor.
Emërimi, i mbështetur nga Qeveria e Kanadasë, e vendos Dr. Milikun mes studiuesve të përzgjedhur për të udhëhequr kërkime shkencore me ndikim në shëndetin dhe mirëqenien e brezave të ardhshëm.
Aktualisht, Dr. Miliku është profesoreshë asistente në Departamentin e Shkencave të Ushqyerjes në Universitetin e Torontos, përgjegjëse për shkencën klinike në studimin kombëtar CHILD dhe drejtuese e programit kërkimor për shëndetin kardiometabolik.
Puna e saj shkencore përqendrohet në ndikimin që ushqyerja në fazat e hershme të jetës ka në zhvillimin dhe shëndetin afatgjatë të fëmijëve. Në fokus të studimeve të saj janë obeziteti, sëmundjet kronike, shëndeti fizik dhe mendor, si dhe pasojat që mund të sjellë konsumimi i ushqimeve ultra të përpunuara.
Ky emërim shoqërohet me një financim prej 500 mijë dollarësh kanadezë për pesë vite, nga të cilat Universiteti i Torontos do të përfitojë 100 mijë dollarë në vit për mbështetjen e kërkimeve të saj.
Rrugëtimi akademik i Dr. Milikut nisi në Shqipëri, ku u diplomua për Mjekësi në Universitetin e Mjekësisë në Tiranë. Më pas, ajo përfundoi doktoraturën në Epidemiologjinë Klinike në Universitetin Erasmus në Holandë, duke vijuar karrierën kërkimore në disa prej institucioneve universitare të njohura në Kanada.
Në vitin 2025, gazeta prestigjioze kanadeze The Globe and Mail e përzgjodhi mes pesë studiuesve më premtues të karrierës së hershme në Kanada, duke vlerësuar kontributin e saj në shkencë dhe mjekësi.
Emërimi i Dr. Kozeta Milikut në programin “Canada Research Chairs” përfaqëson jo vetëm një arritje të rëndësishme personale dhe profesionale, por edhe një histori suksesi të një profesionisteje shqiptare që po kontribuon në zhvillimin e kërkimit shkencor ndërkombëtar.
Ngaliema auditorët e Tiranës në Universitetin e Torontos, rrugëtimi i Dr. Milikut dëshmon se talenti, përkushtimi dhe puna shkencore mund të kapërcejnë kufijtë dhe të lënë gjurmë përtej vendit të origjinës.
Albanian Montreal Press
