By Artisti shqiptar nga Kosova, me mbi 50 vite krijimtari artistike, prezanton në Montreal një ekspozitë që ndërthur artin, kujtesën, qëndresën dhe përvojën njerëzore.
MONTREAL, KANADA – Artisti i njohur shqiptar me origjinë nga Kosova, Zeqirja Rexhepi, do të prezantohet për herë të parë para publikut të Montrealit me ekspozitën personale “Symphony of Survival” (Simfonia e Mbijetesës), e cila do të hapet më 14 nëntor 2026, në orën 18:00, në ambientet e Galerie Ambigu.
Me një karrierë që shtrihet në më shumë se pesë dekada, Rexhepi sjell një krijimtari të pasur, ku arti shndërrohet në një gjuhë universale për të rrëfyer historinë, identitetin, kujtesën dhe përpjekjen e njeriut për t’u përballur me sfidat e jetës.
“Simfonia e Mbijetesës” nuk është thjesht një ekspozitë veprash artistike. Ajo është një ftesë për të reflektuar mbi forcën e shpirtit njerëzor, mbi plagët që lë historia dhe mbi aftësinë e njeriut për të mbijetuar, për të ruajtur kujtesën dhe për të gjetur bukurinë edhe përballë vështirësive.
Përmes gjuhës së artit pamor, Rexhepi ndërton një dialog mes së shkuarës dhe së tashmes, mes përvojës individuale dhe kujtesës kolektive, duke i dhënë artit një dimension të thellë njerëzor dhe kulturor.
Një jetë kushtuar artit, përtej kufijve
I lindur në Kosovë, Zeqirja Rexhepi ka ndërtuar një rrugëtim artistik që ka kapërcyer kufijtë gjeografikë dhe kulturorë, duke prezantuar krijimtarinë e tij në vende të ndryshme të Evropës dhe Kanadasë.
Veprat e tij janë ekspozuar në galeri evropiane, si dhe në Muzeun Kanadez të Imigracionit në Pier 21, në Halifax, një institucion që ruan historitë e emigracionit dhe të diversitetit kulturor në Kanada.
Në rrugëtimin e tij përfshihen gjithashtu realizimi i një murali për aktivitetin Tall Ships në Halifax, krijime artistike për një xhami në Evropë dhe një kishë në Kosovë, si dhe ekspozita “Rrënjët”, e prezantuar në Berat të Shqipërisë.
Këto përvoja dëshmojnë një krijimtari që ndërthur traditën, kulturën, historinë dhe identitetin, duke e vendosur njeriun në qendër të shprehjes artistike.
Montreali, një tjetër ndalesë në rrugëtimin artistik
Prezantimi i parë i Zeqirja Rexhepit në Montreal përbën një tjetër moment të rëndësishëm në karrierën e tij, por edhe një mundësi për publikun vendas dhe komunitetin shqiptar që të njihen nga afër me krijimtarinë e një artisti me përvojë të gjatë ndërkombëtare.
Në një qytet të njohur për shumëllojshmërinë e tij kulturore dhe artistike, “Simfonia e Mbijetesës” sjell një rrëfim ku përvoja shqiptare takohet me tema universale si qëndresa, humbja, shpresa dhe vazhdimësia e jetës.
Për komunitetin shqiptar të Montrealit, kjo ekspozitë është gjithashtu një rast për të vlerësuar dhe promovuar kontributin e artistëve shqiptarë në jetën kulturore kanadeze.
Ekspozita do të hapet të shtunën, më 14 nëntor 2026, në orën 18:00, në Galerie Ambigu, 1761 rue Atateken, Montreal, Quebec.
Një mbrëmje ku arti nuk do të flasë vetëm për atë që shohim, por edhe për atë që mbartim në kujtesë, për atë që kemi përjetuar dhe për forcën që na shtyn të vazhdojmë përpara.
Nga Blerina Ruka- Albania Montreal Press
