By PO SIKUR BERISHA TË JEPTE DORËHEQJEN?
Sado e kalkuluar apo spontane të ketë qenë thirrja «Rama në burg! Berisha në burg!» që në fillim të protestave, mesazhi është i qartë: njerëzit nuk duan të largojnë njërin për të sjellë tjetrin. Janë lodhur me të njëjtët njerëz dhe të njëjtën politikë.
Po sikur Berisha, në moshën 82-vjeçare, të jepte dorëheqjen nga drejtimi i PD-së? Të pranonte se ka ardhur koha t’u hapet rruga brezave të rinj?
Çfarë do të humbiste (lexo fitonte) PD-ja? Po Shqipëria?
PD-ja do të përballej me një provë të madhe: të zgjidhte vetë drejtuesin e saj, pa tutorë dhe pa pazare. Jo një Bashë tjetër, as ndonjë kukull të komanduar nga Berisha apo enturazhi i tij.
Ndërkohë, tërheqja e Berishës do t’ua hiqte Ramës dhe të tijve një nga alibitë e preferuara: «Fajin e ka Saliu!»
Prej më shumë se 13 vjetësh, Rama ka në dorë qeverinë, institucionet dhe policinë. Përgjegjësia për mënyrën si qeveriset vendi dhe si trajtohen protestuesit është e pushtetit të tij. Situata është tejet dramatike. Përplasjet mes studentëve dhe policisë kanë arritur në një pikë të rrezikshme. Protestat do të çojnë pashmangshmërisht në zgjedhje të jashtëzakonshme. Dhe shqiptarëve u duhen alternativa të reja, jo përsëri Rama e Berisha!
Por përpara zgjedhjeve duhen ndryshuar rregullat e lojës. Ligji elektoral duhet ndryshuar urgjentisht, me konsensus. Presidenti duhet ta kthejë në Parlament ligjin e ri për ndarjen territoriale. Ai debat mund të presë. Nuk është aspak urgjent. Ka edhe plot marrëzi të tjera të politikës së vjetër që duhen korrigjuar menjëherë për të bërë të mundur zgjedhje të lira dhe me standarde.
Edhe hyrja në Bashkimin Evropian mund të presë! Të rregullojmë njëherë shtëpinë tonë, të zgjedhim një Parlament që nuk është strehë hajdutësh, pastaj të mendojmë për Evropën. Se nuk na duhet anëtarësimi në BE vetëm për të eksportuar deputetë-banditë në Parlamentin Evropian!
Duhet reaguar tani, para se të fillojmë të numërojmë viktima. Nëse Shqipëria futet në një qerthull dhune, vrasjesh politike dhe larjesh hesapesh në shkallë të gjerë mes bandave, do të jetë tepër vonë për lojërat e zakonshme të (ç)fajësimit.
Nëse situata nuk do të ishte kaq dramatike, do të kisha dëshirë të tallesha pak edhe me pasuesit e mundshëm në të dyja partitë e mëdha. Por, meqë nuk dua të flas pikërisht sot për kaptinat gjashtëcepëshe, po e lë me kaq!
Dorëheqja e Berishës do të ishte bllofi më i madh politik i Shqipërisë postkomuniste. Në një kohë kur i madh e i vogël kërkon dorëheqjen e Ramës, Berisha do t’ia përplaste të vetën në fytyrë, si një dorashkë dueli. Një sfidë e fundit politike. Post mortem!
Dhe mos më thoni që pas kësaj Rama nuk do të çmendej!
