By
PRISHTINË – Mijëra qytetarë nga Kosova dhe trevat shqiptare u mblodhën sot në Prishtinë në kuadër të “Marshit për Liri”, një tubim masiv që përcolli mesazhe solidariteti me luftën çlirimtare të Ushtrisë Çlirimtare të Kosovës dhe me ish-krerët e saj që po përballen me proceset gjyqësore në Hagë.
Rrugët e kryeqytetit u mbushën me flamuj kombëtarë shqiptarë, flamuj të Kosovës dhe simbole të UÇK-së, ndërsa pjesëmarrësit kërkuan drejtësi, dinjitet dhe respekt për kontributin e atyre që luftuan për çlirimin e Kosovës.
Në qendër të mesazheve të marshit ishte solidariteti me Hashim Thaçin, Kadri Veselin, Jakup Krasniqin dhe Rexhep Selimin, ish-drejtues të UÇK-së që ndodhen në Hagë.
Pjesëmarrja e gjerë e qytetarëve e shndërroi Prishtinën në një pikëtakim të shqiptarëve që, përmes marshimit, kërkuan të riafirmojnë lidhjen me historinë e luftës së Kosovës dhe sakrificën e brezave që kontribuuan për lirinë e vendit.
Mes flamujve dhe thirrjeve të qytetarëve, një prej mesazheve që dominoi marshin ishte: “Liria ka emër!”
Për pjesëmarrësit, kjo thirrje përfaqëson jo vetëm solidaritetin me ish-krerët e UÇK-së, por edhe bindjen se historia e luftës çlirimtare dhe kontributi i njerëzve që e shënuan atë mbeten pjesë e pandashme e kujtesës kombëtare.
“Marshi për Liri” vjen vetëm pak ditë përpara 16 shtatorit, duke e vendosur Prishtinën në qendër të një mobilizimi të gjerë qytetar dhe kombëtar.
Mesazhi që doli nga kryeqyteti ishte i fuqishëm: lidhja me historinë, lirinë dhe njerëzit që kontribuuan për të mbetet e gjallë.
Liria ka emër. Liria ka histori. Liria ka çlirimtarët e saj.
