By Nga trajnimi ushtarak në Itali, te emigracioni, mëmësia, angazhimi në komunitet dhe tashmë shërbimi publik në Mississauga – Mendi Kabashi solli në “Women Who Build” një rrëfim personal mbi forcën, identitetin dhe lidershipin.
E ftuar si folëse në aktivitetin “Women Who Build”, Mendi Kabashi ndau me të pranishmit një histori që përmbledh disa prej kapitujve më të rëndësishëm të jetës së saj, duke ngritur një pyetje që, siç shprehet ajo, e ka shoqëruar ndër vite:
Çfarë do të thotë në të vërtetë të jesh e fortë?
Rrugëtimi i Kabashit drejt disiplinës dhe lidershipit nisi që në moshën 17-vjeçare, kur u largua nga shtëpia për të ndjekur trajnimin si oficere ushtarake në Itali. Për pesë vite, disiplina, përgjegjësia dhe qëndrueshmëria u bënë pjesë e jetës së saj të përditshme.
Por mësimi më i rëndësishëm që mori nga ajo periudhë, sipas saj, nuk kishte të bënte vetëm me forcën fizike.
Ishte të kuptonte se nuk kishte nevojë të humbiste vetveten për t’u bërë lidere, të bëhej më e ashpër për të qenë më e fortë, apo të sakrifikonte dhembshurinë dhe feminilitetin për të pasur autoritet.
Ky mësim e shoqëroi më pas në shërbimin qeveritar, emigracion, mëmësi, angazhimin në komunitet dhe sot në rrugëtimin e saj drejt shërbimit publik në Mississauga.
Në skenën e “Women Who Build”, Kabashi përcolli një prej mesazheve më të fuqishme të fjalës së saj:
“Lidershipi nuk ka të bëjë me veshjen e një uniforme. Lidershipi është të dish se kush je, përpara se bota të të tregojë se kush duhet të bëhesh.”
Dhe më tej:
“Ne nuk ndërtojmë duke u bërë dikush tjetër. Ne ndërtojmë duke pasur guximin të mbetemi vetvetja.”
Sot, këto fjalë marrin një domethënie të re për Mendi Kabashin, ndërsa ajo është duke ndërtuar një tjetër kapitull të jetës së saj: një fushatë, marrëdhënie më të forta me qytetarët dhe një vizion për komunitetin ku jeton.
Një vizion që, sipas saj, mbështetet mbi katër parime që kanë shoqëruar edhe rrugëtimin e saj personal: disiplinë, dhembshuri, integritet dhe guxim.
Duke reflektuar mbi eksperiencën, Kabashi shprehu mirënjohjen për Nadiya Yashan, për ftesën për të qenë pjesë e “Women Who Build” dhe për krijimin e një hapësire ku gratë mund të ndajnë historitë dhe eksperiencat e tyre dhe të mësojnë nga njëra-tjetra.
Ajo falënderoi gjithashtu Business Woman Pro Canada dhe të gjitha gratë që pati mundësinë të takonte gjatë aktivitetit. Kontributi i saj si folëse u vlerësua edhe me një Certificate of Appreciation.
Për Mendi Kabashin, rikthimi te ky moment vjen pikërisht në një periudhë kur ajo po ndërton një kapitull të ri të angazhimit të saj publik.
Sepse disa eksperienca marrin një kuptim edhe më të madh kur, duke parë pas, kupton se në të vërtetë po të përgatisnin për atë që do të vinte më pas.
Nga Blerina Ruka/ Albanian Montreal Press
