By 
TORONTO – Rreth 700 deri në 1000 shqiptarë u mblodhën sot në adresën 100 Queen’s Park, përpara Parlamentit të Ontarios, për të shprehur solidaritetin e tyre me protestuesit në Shqipëri dhe për të ngritur zërin mbi çështjet që po shqetësojnë opinionin publik shqiptar.
Me flamuj kuqezi në duar dhe pankarta me mesazhe të ndryshme, pjesëmarrësit përcollën thirrje për ndryshim dhe përgjegjshmëri politike.
“Diaspora është me ju”, “Rama ik” dhe “Berisha ik” ishin disa nga sloganet që u dëgjuan gjatë tubimit, duke reflektuar pakënaqësinë e një pjese të diasporës ndaj klasës politike shqiptare në përgjithësi.
Tubimi u zhvillua në mënyrë paqësore dhe mblodhi shqiptarë të ardhur nga zona të ndryshme të Torontos dhe qyteteve përreth.
Organizatorët theksuan se qëllimi i protestës ishte të shprehnin mbështetjen për qytetarët në Shqipëri dhe të nxisnin ndërgjegjësimin mbi çështje që lidhen me të ardhmen e vendit, mbrojtjen e interesit publik dhe forcimin e demokracisë.
Pjesëmarrësit shprehën shqetësim edhe për zhvillimet e fundit që lidhen me projektet e mëdha turistike në zonat e mbrojtura të Shqipërisë, duke kërkuar që pasuritë natyrore dhe kombëtare të ruhen për brezat e ardhshëm.
Tubimi dëshmoi edhe një herë se diaspora shqiptare në Kanada mbetet e lidhur ngushtë me zhvillimet në atdhe dhe është e gatshme të shprehë publikisht qëndrimet e saj për çështje që i konsideron me rëndësi kombëtare.
