By 
Në ambientet e Konsullatës së Republikës së Kosovës në Toronto u zhvillua promovimi i dy librave më të rinj të autores Armenida Qyqja, “Mos ma zgjoni Dodonën” dhe “Hieroglifet e mallit”, në një mbrëmje të mbushur me poezi, muzikë, emocione dhe reflektim mbi identitetin, mallin dhe rrënjët shqiptare. Aktiviteti u hap nga moderatorja e mbrëmjes, Edlira Çini, e cila theksoi se, pas një rrugëtimi të suksesshëm në trojet shqiptare, librat mbërritën në Toronto, qytetin ku autorja nisi jetën e saj si emigrante dhe ku hodhi hapat e parë të rrugëtimit të saj letrar.
Të pranishmit i përshëndeti Konsulli i Republikës së Kosovës, z. Kadri Dakaj, i cili vlerësoi rëndësinë e promovimit të kulturës dhe letërsisë shqiptare në diasporë, ndërsa një fjalë përshëndetëse mbajti edhe zonja Ruki Kondaj, e cila kontribuoi në organizimin e kësaj veprimtarie kulturore. Një moment i veçantë i mbrëmjes ishte paraqitja e aktorit të madh të skenës shqiptare, Bujar Asqeriu, i cili përmes një regjistrimi artistik solli për publikun interpretimin e një prej poezive të autores. Programi vijoi me recitime nga artistë dhe dashamirës të letërsisë, të cilët i dhanë jetë vargjeve të Armenida Qyqjës.
Poezitë u interpretuan nga Xhemi Agaj, Holta Këllezi, Ruki Kondaj, Luan Pula, Danjeza Dangelli dhe moderatorja e mbrëmjes, duke sjellë para publikut tema që prekin atdheun, kujtesën historike, dashurinë, mallin dhe identitetin. Një tjetër moment emocionues ishte transmetimi i kënges “Kete Nate te Shenjte” me tekst te Armeninda Qyqja-s interpretuar nga Eriola Gusho. Gjatë gjithë mbrëmjes, recitimet u shoqëruan mjeshtërisht në kitarë nga artisti Gjosho Çuni, i cili kontribuoi në krijimin e atmosferës së ngrohtë artistike dhe interpretoi gjithashtu një pjesë muzikore të bazuar në poezinë e autores.
Një nga kulmet e aktivitetit ishte fjala e vetë Armenida Qyqjës, e cila ndau me të pranishmit përvojat, frymëzimet dhe sfidat që kanë shoqëruar rrugëtimin e saj krijues. Ajo foli për rëndësinë e ruajtjes së identitetit kulturor, për mallin e emigrantit dhe për përgjegjësinë që letërsia ka në ruajtjen e kujtesës kolektive. Mbrëmja u përmbyll me interpretimin e një poezie nga mjeshtri i madh i teatrit dhe kinematografisë shqiptare, Reshat Arbana, duke i dhënë aktivitetit një fund dinjitoz dhe artistik.
Promovimi i “Mos ma zgjoni Dodonën” dhe “Hieroglifet e mallit” ishte një takim i diasporës shqiptare me kujtesën, historinë dhe shpirtin e saj. Nëpërmjet poezisë së Armenida Qyqjës, publiku pati mundësinë të reflektojë mbi pyetjen që përshkon të gjithë krijimtarinë e saj: “A kapërcehet dot malli?” Ndoshta jo plotësisht. Por, siç dëshmoi kjo mbrëmje, letërsia ka fuqinë ta bëjë atë më të lehtë për t’u mbajtur.
