By Në një mbrëmje të mbushur me emocion, dinjitet dhe krenari kombëtare, Parlamenti i Kanadasë u bë skena ku u nderuan 25 histori të jashtëzakonshme të komunitetit shqiptar në diasporë.
Mbrëmja e 25 marsit 2026, në ndërtesën prestigjioze Sir John A. Macdonald Building në Parlamentin e Kanadasë, u shndërrua në një moment të veçantë për komunitetin shqiptar. Një organizim dinjitoz që bashkoi histori të forta njerëzore, reflektim dhe një dimension të pasur artistik, duke shënuar 25 vite qëndrueshmërie dhe kontributi të refugjatëve.
‘25 @ 25’ nuk ishte thjesht një ceremoni — ishte një afirmim i historive tona dhe një festë e vlerave që na bashkojnë.
Si moderatore e mbrëmjes, së bashku me Roni Krasniqi, pata privilegjin të udhëheq një program që rrodhi natyrshëm, duke ruajtur një ekuilibër të kujdesshëm mes solemnitetit dhe emocioneve të thella që përcolli kjo ngjarje.
Eventi “25 @ 25”, një iniciativë vizionare e Arta Rexhepi dhe e Fondacioni Artistè, e jetësuar në partneritet me deputetin Kyle Seeback, pati në qendër nderimin e 25 individëve, rrugëtimet e të cilëve mishërojnë kurajë, qëndrueshmëri dhe lidership në shoqërinë kanadeze.
Adresime që frymëzojnë
Mbrëmja nisi me fjalën hapëse të Arta Rexhepi, e cila vendosi tonin e eventit me një mesazh prekës mbi rëndësinë e kujtesës dhe mbrojtjen e identitetit.
Atmosfera u pasurua me adresimet e rëndësishme të Ambasadorit të Kosovës, Adriatik Kryeziu, dhe profesoreshës së Universitetit të Kolumbias, Tanya Domi, e cila, si shqiptare e brezit të tretë, solli një perspektivë të çmuar ndërbrezore.
Një moment që krijoi një afërsi të veçantë me të pranishmit ishte fjala e ngrohtë e Kyle Seeback. Përtej mbështetjes institucionale, shumë të ftuar zbuluan me kënaqësi lidhjen e tij familjare me komunitetin shqiptar, si bashkëshort i Flutura Mazreku, duke e bërë këtë moment edhe më personal dhe domethënës.
Arti si dëshmi e shpirtit shqiptar
Dimensioni artistik ishte pa dyshim zemra e këtij aktiviteti, duke i dhënë eventit thellësi emocionale dhe identitet kulturor. Programi solli një ndërthurje të kujdesshme performancash që lidhën rrënjët me të tashmen.
Performanca e Xhemi Agaj, e shoqëruar nga grupi polifonik, ishte një nga momentet më të ndjera të mbrëmjes, duke rikthyer fuqishëm tingujt e traditës shqiptare.
Po aq mbresëlënëse ishte paraqitja e Tringa Rexhepi, e cila solli një interpretim elegant që ndërthurte stilin bashkëkohor me elementët tradicionalë.
Energjia e skenës u gjallërua nga Vatra Dance Group of Windsor, nën drejtimin e Joli Agolli Paparisto, me një performancë plot jetë nga valltarët e vegjël, ndërsa Albjon Gjollaku solli një prezencë artistike të nivelit ndërkombëtar.
Në të njëjtën linjë artistike, Altin Buli dhe Edona Vilasalihu-Kuçi përfaqësuan një nivel të lartë profesional dhe akademik, duke i dhënë mbrëmjes një dimension të rafinuar.
Një element i spikatur vizual ishte kontributi i Glejdis Syla, e cila solli një prezantim të bukur të veshjeve tradicionale shqiptare, duke e pasuruar atmosferën e Parlamentit me ngjyra dhe identitet kombëtar.
Nderimi i 25 historive të suksesit
Kulmi i mbrëmjes ishte prezantimi i 25 të vlerësuarve, të ndarë në dy segmente, duke i dhënë secilës histori hapësirën dhe dinjitetin e merituar.
Ata përfaqësojnë jo vetëm suksesin individual, por edhe rrugëtimin e një komuniteti që ka rindërtuar jetën me përkushtim dhe vendosmëri. Nga profesionistë të fushave të ndryshme deri te figura publike dhe aktivistë, si Lirim Hajrullahu, Remzi Cej dhe Shpresa Loshaj, secili prej tyre mishëron një histori që tejkalon sfidat e së kaluarës.
Një moment veçanërisht prekës ishte edhe vlerësimi pas vdekjes për Dr. Agron Alija.
Kjo mbrëmje në Parlamentin e Kanadasë u shndërrua në një dëshmi të fuqishme të qëndrueshmërisë, identitetit dhe kontributit të refugjatëve.
Mbrëmja u përmbyll me një pritje kokteji dhe muzikë live nga Kristian Gusho dhe dueti Klea Cani & Eriola Gusho, duke krijuar një harmoni të veçantë që mbeti gjatë në kujtesë.
Suksesi i kësaj mbrëmjeje gala mban vulën e punës së palodhur dhe përkushtimit të jashtëzakonshëm të ekipit të Fondacionit Artistè, ku spikasin kontributet e Ilirjana Latifi, Arnisa Morina, Belinda Lahu, Shkendije Ibishi, Venesa Sulimani, Donjeta Elshani Hetemi, Edlira Begeja Çini dhe Arber Rexhepi, si dhe energjia dhe dedikimi i çmuar i vullnetarëve që e bënë këtë event të mundur.
Atmosfera finale e mbrëmjes, me të pranishmit që ndanin momente, fotografi dhe emocione së bashku, la pas një ndjenjë të thellë krenarie dhe përkatësie.
Në rolin tim si Drejtoreshë e Komunikimit dhe Marrëdhënieve Publike për Fondacioni Artistè dhe përmes Albanian Montreal Press, e përjetova këtë mbrëmje si një dëshmi të gjallë të fuqisë së tregimit, kujtesës dhe identitetit.
Përgatiti: Blerina Ruka/ editore e Albanian Montreal Press dhe Drejtoreshë e Komunikimit për Fondacioni Artistè
Fotografia: Flamur Ilazi (@Flamurstudios) https://www.flamurstudios.ca/
