By Një zhvillim me rëndësi historike dhe simbolike është shënuar për qytetin e Shkodrës dhe për komunitetin shqiptar në Windsor dhe në mbarë Kanadanë. Pas një procesi të gjatë aplikimi dhe një angazhimi të vazhdueshëm institucional, është aprovuar zyrtarisht mocioni për nisjen e diskutimeve për binjakëzimin e qytetit të Shkodër me qytetin e Windsor.
Ky vendim i rëndësishëm vjen si rezultat i përpjekjeve të koordinuara nga përfaqësues shqiptarë nga Shqipëria dhe Kosova Shoqata Shqiptare e Windsorit / Albanian Association of Windsor, me synimin për të ndërtuar ura bashkëpunimi mes qyteteve dhe për të forcuar lidhjet kulturore, institucionale dhe ekonomike mes komuniteteve. Në kuadër të këtij procesi, është parashikuar që gjatë muajve janar ose shkurt 2026 të mbahet një takim zyrtar mes përfaqësuesve të Shkodrës dhe zyrtarëve të Komitetit Ndërkombëtar të qytetit të Windsor-it, ku do të hidhen themelet e para të këtij bashkëpunimi afatgjatë.
Binjakëzimi synon të zhvillohet në disa fusha kyçe, si kultura, ekonomia, arsimi, turizmi dhe menaxhimi urban, duke krijuar mundësi të reja shkëmbimi për institucione, profesionistë, të rinj dhe organizata të shoqërisë civile. Ky partneritet pritet të shërbejë si një model bashkëpunimi ndërkombëtar dhe si një platformë konkrete për promovimin e trashëgimisë kulturore dhe potencialit zhvillimor të qyteteve partnere.
Po ashtu, gjatë diskutimeve të zhvilluara me këshilltarë të Windsor City Hall dhe Komitetin Ndërkombëtar përkatës, është rënë dakord që viti i ardhshëm të shënojë edhe nisjen e procesit për binjakëzimin mes qytetit të Ferizaj dhe Windsor-it, duke zgjeruar më tej këtë nismë bashkëpunimi që përfshin shqiptarët në disa shtete.
Ky zhvillim përbën një arritje të rëndësishme historike, pasi konsiderohet binjakëzimi i parë i këtij lloji mes një qyteti nga Shqipëria dhe një qyteti nga Kanadaja. Një hap domethënës që jo vetëm forcon marrëdhëniet ndërkombëtare, por edhe afirmon rolin aktiv të diasporës shqiptare në ndërtimin e lidhjeve të qëndrueshme mes vendeve.
