By Toronto u bë qendra e kujtimit dhe nderimit për Artistin e Madh të Kombit, Mirush Kabashi, në dyvjetorin e ndarjes së tij nga jeta. Më 5 dhjetor 2025, përfaqësues të institucioneve shqiptare në Kanada, familjarë, artistë dhe anëtarë të komunitetit u mblodhën për të nderuar figurën e jashtëzakonshme të aktorit që la gjurmë të pashlyeshme në kulturën kombëtare.
Mbrëmja përkujtimore u organizua nga Ambasada e Republikës së Shqipërisë në Kanada, në bashkëpunim me Konsullatën e Përgjithshme të Kosovës në Toronto, Shoqatën e Bashkësisë Shqiptaro-Kanadeze, Alb TV-Canada, si edhe shoqata të tjera të komunitetit shqiptar. Të pranishmit ndanë kujtime, rrëfime dhe reflektime për jetën, artin dhe mesazhin e fuqishëm të Mirush Kabashit—një artist që u cilësua shpesh “Sokrati Shqiptar” për interpretimet e tij të thella, sfiduese dhe të paharrueshme.
Në fjalët përshëndetëse u theksua se Mirush Kabashi nuk ishte vetëm aktor, por një zë i ndërgjegjes kombëtare, një njeri që përçonte të vërtetën përmes artit, duke sfiduar padrejtësinë, hipokrizinë dhe kufizimet e fjalës së lirë. Shprehjet e tij, poezia dhe heshtjet domethënëse në skenë ishin “thirrje për reflektim” për brezat e djeshëm dhe të sotëm.
Mirush Kabashi lindi më 17 prill 1948 në Shkodër, me origjinë nga Gjakova, dhe u rrit në Durrës. Ai u diplomua në Institutin e Lartë të Arteve në vitin 1970, duke nisur një karrierë monumentale në Teatrin “Aleksandër Moisiu”, më pas në Televizionin Shqiptar dhe për më shumë se dy dekada në Teatrin Kombëtar. Ka interpretuar mbi 100 role teatrale dhe rreth 20 role në kinematografi. U nderua me titujt “Nderi i Kombit”, “Artist i Merituar” dhe “Mjeshtër i Madh i Punës”.
Në Toronto, mes një atmosfere respekti të thellë, u vu në pah trashëgimia e tij – një testament i pavdekshëm artistik dhe njerëzor që frymëzon brezat. Fjalët e tij, të gdhendura në kujtesën e publikut shqiptar, vijojnë të jetojnë përtej skenës dhe kohës.
Mbrëmja u mbyll me mirënjohje të sinqertë për figurën e artistit që na bëri krenarë dhe mbetet një shtyllë e identitetit kulturor shqiptar.
