By Përurimi zyrtar i fondacionit The Artistè Foundation mblodhi të shtunën e kaluar dhjetëra shqiptarë në zemër të Kanadasë. Anëtarë të bordit të fondacionit, përfaqësues diplomatikë të Republikës së Kosovës dhe Shqipërisë, aktivistë, veprimtarë, dashamirës të artit dhe mbështetës të projektit u bashkuan në ambientet e Konsullatës së Përgjithshme të Republikës së Kosovës në Toronto për të përuruar këtë nismë kulturore dhe humanitare.
Prej gati gjashtë muajsh pune intensive, themeluesja e fondacionit, Arta Rexhepi, ka ndërtuar një bord drejtues të përbërë nga gra dhe vajza nga Shqipëria dhe Kosova, të përfshira në jetën komunitare në të gjitha provincat e Kanadasë. Me një video prezantuese të kuruar me kujdes, u shpalosën misioni, objektivat dhe vizioni i fondacionit The Artistè , duke theksuar nevojën që zërat e grave të dëgjohen, veçanërisht ato që mbartin rrëfime të dhimbshme, histori dhune, shpërnguljesh dhe ikjesh nga lufta e vitit 1999.
Megjithatë, fondacioni nuk synon të mbetet vetëm nën hijen e historive të trishta. Qëllimi i tij është të shtrihet më gjerë: të mbështesë dhe promovojë vajzat e gratë shqiptare që synojnë zhvillim profesional dhe artistik, duke u ofruar një platformë të besueshme për të ecur përpara në karrierë.
Nën moderimin e Blerina Rukës nga Albanian Montreal Press, zonjat anëtare të fondacionit, Venesa Sulimani, Ilirjana Latifi, Shkëndije Ibishi, Arnisa Morina, Eda Begeja Çini, sollën pjesë nga historitë e tyre personale, fragmente të të cilave publiku do të ketë mundësi t’i njohë më imtësisht në vazhdim.
Eventi u nderua edhe nga prania e përfaqësuesve diplomatikë shqiptarë në Kanada, Ambasadori i Republikës së Kosovës, z. Adriatik Kryeziu, Ambasadorja e Republikës së Shqipërisë, znj. Artemis Malo si dhe Konsulli i Përgjithshëm i Republikës së Kosovës, z. Kadri Dakaj. Të gjithë në një mendje, ata përshëndetën organizimin dhe theksuan rëndësinë e këtij fondacioni për memorjen kolektive të komunitetit shqiptar si dhe shprehën bindjen se fondaciomi The Artistè do të lërë një gjurmë të pashlyeshme në promovimin e kulturës, artit dhe identitetit shqiptar.
Mbrëmja u shoqërua me një program artistik të larmishëm, që dëshmoi edhe një herë pasurinë kulturore të komunitetit shqiptar në Kanada. “Shqiponjat e vogla”, nën koreografinë e mjeshtrit Ramazan Këllezi, sollën valle tradicionale shqiptare; ndërsa Klea Cani i emocionoi të pranishmit me tingujt e “Baresha”-s në violinë. Artistja shqiptaro-kanadeze e konfirmuar Tringa Rexhepi dha një performancë mbresëlënëse, duke përforcuar atmosferën festive dhe shpirtërore të mbrëmjes. Një veçanti e mbrëmjes ishte edhe artistja me emrin e artit Sahati, vajzë e lindur në Kanada por e rritur në Kosovë, e cila prezantoi videklipin e këngës së saj më të re, të xhiruar në Kosovë.
The Artiste Foundation hap kështu një kapitull të ri në jetën kulturore të komunitetit shqiptar në Kanada, duke synuar të bëhet një pikë referimi për artin, zërin e gruas dhe ruajtjen e trashëgimisë sonë kombëtare.
