By Intervistë me Amarildo Cekën dhe Enis Alushin / Organizatorët e Rrjetit të Profesionistëve Shqiptarë – Edicioni i Calgary-t
Amarildo Ceka është kandidat doktorant në Shkollën e Shëndetit Publik në Universitetin e Kolumbisë Britanike (UBC) dhe është Drejtor Ekzekutiv i Shoqatës Shqiptaro-Kanadeze për Progres Social dhe Ekonomik (ACSEP). Ai ka udhëhequr disa iniciativa që lidhin profesionistët shqiptarë në diasporë me qëllim forcimin e identitetit dhe rrjeteve të bashkëpunimit.
Enis Alushi është Drejtor i Shoqatës Shqiptare të Calgary-t dhe një zë i rëndësishëm për komunitetin shqiptar në provincën e Albertës. Ai ka luajtur një rol kyç në sjelljen e këtij modeli të suksesshëm në Calgary pas suksesit në Vancouver.
Albanian Montreal Press:
Le të fillojmë nga fillimi. Amarildo, ju keni organizuar 2 evente për rrjetëzim profesional në British Columbia. Si ishte përvoja në vitet 2024 dhe 2025?
Amarildo Ceka:
E nisëm pa shumë pritshmëri, pasi ishte diçka që nuk kishte ndodhur më parë në këtë madhësi në provincë. Përtej modestisë fillestare, përvoja ishte e jashtëzakonshme. Organizuan dy takime në vitet 2024 dhe 2025 që mblodhën mbi 250 profesionistë, studentë dhe liderë nga komuniteti shqiptar në British Columbia. Mund të shikoni këtu listen e folësve: https://acsep.org/albanian-professionals-network/ Reagimi ishte jashtë çdo parashikimi—njerëzit ndiheshin të emocionuar dhe të lidhur, sepse më në fund kishin një hapësirë ku mund të ndanin jo vetëm përkatësinë kulturore por dhe atë profesionale. Këto nuk ishin thjesht ngjarje formale për të shkëmbyer kartvizita, por u kthyen në pika takimi ku filluan ide të reja, mentorime dhe bashkëpunime që vazhdojnë edhe sot.
Albanian Professionals Network Event 2024
Albanian Professionals Network Event 2025.
Albanian Montreal Press:
Çfarë e bëri të veçantë këtë event?
Amarildo Ceka:
Sinqeriteti dhe qëllimi. Nuk ishin vetëm për të bërë foto dhe ajo që e bëri vërtet të veçantë këtë përvojë ishte ndjenja që po ndërtonim diçka të përbashkët—një rrjet që i përket të gjithë brezave dhe që hap rrugën për ndërveprim të qëndrueshëm dhe frymëzues në gjithë diasporën shqiptare në Kanada.
Albanian Montreal Press:
Enis, si u soll kjo ide në Calgary?
Enis Alushi:
Kur pashë çfarë po bënte Amarildo në Vancouver, ndjeva menjëherë që kjo mungonte edhe këtu. Kemi një komunitet të fortë në Calgary, por rrjetet profesionale kanë qenë shpesh të fragmentuara. Biseduam disa herë dhe u bë e qartë që edhe Calgary kishte nevojë për një hapësirë të tillë.
Albanian Montreal Press:
Si do të duket eventi në Calgary?
Enis Alushi:
Do të jetë një event gjysëm ditor me një panel me disa folës, diskutime interaktive, hapësira për mentorim dhe një ambient mikpritës. Do të kemi profesionistë nga të gjithë trevat shqiptare dhe nga fusha të ndryshme.
Albanian Montreal Press:
Si po zgjidhni folësit dhe pjesëmarrësit?
Amarildo Ceka:
Po përpiqemi të përfshijmë një larmi përfaqësimi—në moshë, gjini, profesion dhe eksperiencë. Duam të prezantojmë historitë e brezit të parë që ngritën biznese, por edhe të brezit të dytë që po ndërtojnë karrierë në sektorë të rinj.
Albanian Montreal Press:
Pse janë të rëndësishme këto evente për diasporën shqiptare?
Enis Alushi:
Sepse rrjetëzimi është fuqi. Shumë shqiptarë vijnë në Kanada me përgatitje të lartë dhe ambicie, por pa akses në rrjete që ndihmojnë suksesin. Këto evente ndërtojnë ura, frymëzim dhe besim.
Albanian Montreal Press:
Amarildo, shpesh flisni për “infrastrukturë për zhvillimin e diasporës.” Na e shpjegoni pak këtë?
Amarildo Ceka:
Po. Identiteti kulturor nuk mjafton. Na duhen struktura organizative që mbajnë gjallë lidhjet—qofshin mentorime, statistika mbi komunitetin, mbështetje për sipërmarrësit, apo partneritete me institucione Kanadeze. Ky rrjet profesionistësh është vetëm një hap drejt kësaj vizioni më të gjerë.
Albanian Montreal Press: :
Fjalët e fundit për ata që po mendojnë të marrin pjesë?
Enis Alushi:
Ejani. Qoftë student, profesionist i ri apo me përvojë, të gjithë janë të mirëpritur. Për këdo që është i interesuar të marrë pjesë, në këtë link do të kenë mundësinë të ndajnë mendimet e tyre:: https://ubc.ca1.qualtrics.com/jfe/form/SV_cM7x5gaaSaWw8iG
Amarildo Ceka:
Kjo është mënyra se si ndërtojmë një forcë të përbashkët brezash. Ju ftojmë nga zemra që të bëheni pjesë, të ndani historinë tuaj dhe të ndihmoni në formësimin e kapitullit të ardhshëm të komunitetit shqiptar në Kanada. Calgary, shihemi në vjeshtë!
