By Mbreti dhe mbretëresha e Spanjës nderojnë me praninë e tyre sopranon e njohur Ermonela Jaho në Madrid
Mbreti dhe mbretëresha e Spanjës, Felipe VI dhe Letizia, kanë ndjekur nga afër shfaqjen operistike “Adriana Lecouvreur” në Teatrin Mbretëror të Madridit, ku sopranoja e mirënjohur shqiptare, Ermonela Jaho, ka mahnitur publikun. Shfaqja, e cila përkon me hapjen e sezonit të ri artistik, do të vazhdojë me pesë data të tjera: më 29 shtator dhe 2, 5, 8 dhe 11 tetor.
Pas debutimit të saj të shkëlqyer në rolin kryesor, Ermonela Jaho u nderua me duartrokitje të forta nga audienca dhe artistët kolegë, ndërsa madhështia e interpretimit të saj shkëlqeu në këtë vepër të madhe operistike. Sopranoja shqiptare falënderoi publikun madrilen për mbështetjen e tij të ngrohtë, duke ndarë një mesazh emocionues në rrjetet sociale.
“Faleminderit Madrid për dashurinë tuaj. Nuk mund t’ia kisha dalë pa artin e jashtëzakonshëm të kolegëve të mi dhe familjes së Teatro Real,” ka shkruar Jaho në rrjetin social Facebook, duke reflektuar për përjetimin e saj të veçantë në këtë ngjarje prestigjioze.
Përveç suksesit artistik, një moment i veçantë ishte takimi i saj me mbretin dhe mbretëreshën e Spanjës pas shfaqjes, një nder i rrallë për një artist, që tregon edhe një herë vlerësimin ndërkombëtar që Ermonela Jaho gëzon në botën e operës.
