E shtuna e fundjavës së shkuar bëri bashkë mjaft shqiptarë të të gjitha provincave të Kanadasë në nderim të Javës Kulturore të Kosovës, e cila mbahet për herë të parë në Amerikën e Veriut.
Zëvendëskryeministrja dhe Ministrja e Punëve të Jashtme dhe Diasporës, Donika Gërvalla,
Ministria e Punëve të Jashtme dhe Diasporës dhe Ambasada e Republikës së Kosovës në Kanada me z. Adriatik Kryeziu, ftuan komunitetin shqipfolës në Toronto në një mbrëmje artistike në emër të 25 vjetorit të mikpritjes kanadeze për refugjatët nga Kosova dhe 15 vjetorin e lidhjes së marrëdhënieve diplomatike mes du vendeve; Republikës së Kosovës dhe Kanadasë.
Senatorja kanadeze, Rebecca Patterson
E ftuar në Kanada, Zëvendëskryeministrja dhe Ministrja e Punëve të Jashtme dhe Diasporës, Donika Gërvalla, shprehu mirënjohjen e thellë dhe falënderimet e shtetit dhe qytetarëve tanë ndaj mbështetjes së madhe, mikpritjen dhe kontributin e Kanadasë në çlirim dhe zhvillim të Kosovës dhe në veçanti integrim dhe mbështetje të mërgatës sonë në Kanada. Ajo u shpreh se refugjatët e atëhershëm, sot janë pjesë e rëndësishme e shoqërisë kanadeze. “Ata janë ambasadorët më të mirë të Kosovës. Ndërtojnë ura të fuqishme mes Kosovës dhe Kanadasë, por pa harruar asnjë herë vendin e tyre”, tha Ministrja Gërvalla. Nga ana tjetër senatorja kanadeze, Rebecca Patterson foli rreth marrëdhënieve të fuqishme mes Kanadasë dhe Republikës së Kosovës si dhe miqësinë mes dy popujve tanë.
Eventi i vitit ngjiti në skenë emra elitarë të artit shqiptar e kanadez; nën tingujt e Orkestrës Filarmonike të Torontos, nën dirigjimin e Mjeshtrit të Madh Bujar Llapaj dhe Drejtorit Ekzekutiv dhe Artistik Qazim Kallushi, dhe tenorit me famë botërore, Ramë Lahaj mbajtën peshë zemrat e spektatorit duke risjellë në skenë emra të kompozitorëve lirikë shqiptarë e botërorë.
Dirigjenti Llapaj dhe Drejtori Artistik Kallushi nëpërmjet interpretimin të përkryer të tenorit Lahaj, rikthyen në skenë emra të kulturës për të mos vdekur kurrë si Çesk Zadeja, Feim Ibrahimi, Gjokë Beci, Thoma Gaqi, Rexho Mulliqi, Gridi Kraja, dhe vepra nga kompozitorë botërore si Verdi, Puccini, Edward Elgar.
Pothuaj i gjithë repertori i zgjedhur u përkrah nga audienca shqiptare duke kënduar e duartrokitur të ftuarin special këngëtarin lirik, tenorin Rame Lahaj, dirigjentin e mrekullueshëm Bujar Llapaj dhe violinën e parë Entela Galanxhi. Mbrëmja u moderua me profesionalizëm në të dyja gjuhët shqip dhe anglisht, nga aktori Xhemi Agaj dhe Klodiana Vata. Nga Blerina Ruka/ Albanian Montreal Press
By 
