Vendi nuk ka opozitë, pra nuk ka as demokraci- Nga Dritan Shano

Vendi nuk ka opozitë, pra nuk ka as demokraci- Nga Dritan Shano

PD nuk mund t’i ofrojë zgjedhje të lira e të ndershme Shqiptarëve, nëse nuk zhvillon zgjedhje të lira e të ndershme brenda saj!

[Kur merr kredi, do paguash kredinë dhe interesat. Nëse nuk paguan këstet e kredisë, banka nuk të le më të jetosh e punosh si më parë; të çon përmbaruesit dhe të merr biznesin, shtëpinë, makinën, biçikletën, televizorin, këpucët, dhe edhe shapkat me gisht. Kjo është kontrata, ky është i sistemi. Në fakt, në Shqipëri ka mjaft njerëz që kanë marrë kredi, dhe nuk e kanë kthyer. Kjo nuk i jep të drejtë atyre, thjesht tregon se ata janë më të fortë se sistemi. Kjo tregon një Forcë të keqe që prish tregun dhe rregullat e lojës. Njerëzit që ushtrojnë këtë Forcë zakonisht i quajmë oligarkë …]
Para 5 muajsh, Basha u bë kryetar me votat dhe mbështetjen e drejpërdrejtë të Berishës – me kredi nga Berisha dhe mbështetësit e tij, duke eliminuar kështu lehtësisht çdo alternativë të tretë. Berisha, duke e mbështetur Bashën e legjitimoi atë si kryetar, përmes një pseudo-gare ku vetë Basha hyri në avantazh të madh përkundër kandidatëve të tjerë. (kjo lloj dhune, e përsëritur papushim është akoma më e rëndë se dhuna fizike, por kjo është temë tjetër)Basha, në datën 9 Shtator, pasi kishte siguruar vulën e PD, morri një vendim. Përjashtoi Berishën. I tha Berishës dhe mbështetësve të Berishës që kredinë që më dhatë nuk e kthej, pra u bëri një gropë në bilanc atyre, duke treguar Forcë. Standarti minimal do ishte dorëheqja dhe kërkimi i votëbesimit të sapohumbur të një pjese të anëtarësisë.Ky vendim i njëkahshëm i Bashës ndryshoi realitetin dhe ekuilibrat politikë brenda PD.
Vetëm një idiot mund të mendojë se është normale, legjitime, pra se e ka akoma si kryetar edhe votën e mbështetësve të Berishës, pasi u ka rrëzuar atyre me një vendim personal Berishën. Zbatimi i paturpshëm i kësaj idiotësie nga Basha, ka prodhuar dhe ushqen konfliktin civil – një spektakël mesjetar për hir të së vërtetës – që po asgjëson PD. Po, konflikti mes Bashës dhe Berishës po e asgjëson PD. Ky konflikt mund të zgjidhet vetëm përmes një proçesi transparent zgjedhjesh për lidershipin e PD-së. Ky proçes zgjedhor mund të zhvillohet vetëm në kushte të barabarta, pra vetëm pasi Basha të ketë dhënë dorëheqjen nga posti i Kryetarit të PD, të cilin e morri me mbështetjen e Berishës.Natyrisht, Basha dhe Berisha nuk mund të jenë më një alternativë për të shëruar PD, për ta kompaktësuar atë, dhe kthyer në një alternativë të besueshme për shqiptarët.
As njeri as tjetri nuk e sjellin dot PD në pushtet. Mendoj se shumica absolute në PD ka nevojë për një qasje të re, për ide të reja dhe për njerëz të rinj të papërlyer.Por ky është thjesht mendimi im. Kryetari legjitim i PD do jetë ai që zgjedhin anëtarët. Ky do ishte një kryetar që mund të ngjiste të gjitha copat e thyera të PD-sëPor, që kjo të ndodhë PD ka nevojë për zgjedhje të reja, transparente dhe të barabarta. Zgjedhje të lira! Pra ushtrim të Votës dhe jo të “Forcës”. Sa më shpejt aq më mirë. Prej kohe vendi nuk ka opozitë! Nuk ka demokraci! Nuk ka të ardhme!

administrator

Related Articles

Leave a Reply

Your email address will not be published. Required fields are marked *