By Tragjedi në Florida: Tre fëmijë të një familjeje shqiptare humbin jetën nga zjarri Shkaqet e ngjarjes janë ende nën hetim.
Një tragjedi e rëndë ka tronditur komunitetin në Jacksonville, Florida, ku tre fëmijë humbën jetën si pasojë e një zjarri të fuqishëm që përfshiu banesën ku ndodheshin, mëngjesin e së mërkurës, 26 gusht.
Sipas raportimeve të mediave shqiptare, bëhet fjalë për një familje me origjinë shqiptare. Ndërkohë, autoritetet amerikane kanë konfirmuar se, përveç tre viktimave, dy fëmijë dhe dy të rritur janë transportuar në spital në gjendje kritike.
Sipas shefit të Jacksonville Fire and Rescue Department, Percy Golden II, ekipet e emergjencës u njoftuan për zjarrin pak pas orës 05:00 të mëngjesit. Kur zjarrfikësit mbërritën në vendngjarje, kati i parë i banesës ishte përfshirë nga flakë të fuqishme, ndërsa kati i dytë ishte mbushur me tym.
Dy të rritur dhe dy fëmijë kishin arritur të dilnin nga banesa përpara mbërritjes së zjarrfikësve. Ata u dërguan në spital në gjendje kritike.
Gjatë operacionit të kërkim-shpëtimit, zjarrfikësit hynë në ndërtesë dhe gjetën tre fëmijët e tjerë pa shenja jete.
Autoritetet nuk kanë bërë ende publike moshat e viktimave.
Zjarri shkaktoi dëme të rënda në banesë dhe preku gjithashtu njësi të tjera pranë saj. Kryqi i Kuq Amerikan është angazhuar për të ndihmuar banorët e zhvendosur si pasojë e ngjarjes.
Shkaqet e zjarrit mbeten ende të panjohura dhe autoritetet kanë nisur hetimet për të përcaktuar rrethanat e plota të tragjedisë.
Ngjarja ka shkaktuar tronditje të thellë, ndërsa vëmendja mbetet te gjendja shëndetësore e katër personave që vazhdojnë të luftojnë për jetën.
Lajmi do të përditësohet ndërsa autoritetet amerikane bëjnë publike informacione të reja.
