By U zhvilluar mbrëmjen e djeshme në Toronto ceremonia e ndarjes së bursave për studentët e shkëlqyer shqiptarë me banim në Kanada. Me një agjendë të kthyer në traditë në cdo vjeshtë në provicën e Ontarios, dhe me vëmendjen e dedikuar të organizatës, të themeluar nga Tea e Teuta Haxhillari që në vitin 2013, studentëve të ekselencës iu shpërndanë bursat e studimit për vitin e ardhshëm. Me një aktivitet të kuruar nga një staf profesional dhe me pjesëmarrje të gjerë nga komuniteti shqiptaro-kanadez, eventi u shoqërua edhe me prezantimin e filmit shqiptar më të përfolur të momentit, komedinë NË KUADËR TË DASHURISË.
Pas një reklame e cila bëri xhiron e rrjetit, dhe protagonistëve të filmit mjaft të përfolur sidomos këtë vit, komedia nxiti kuriozitet për tu ndjekur nga afër në hollin e Innis Town. Të pranishmit morën edhe mesazhin e ardhur nga aktori kryesor i filmit, Luzi Ejlli, i cili në mungesë fizike përshëndeti dashamirësit e artit të tij me një video enkas për publikun kanadez.
Në kuadër të shpalljes së nëntorit në Ontario, si Muaji i Trashëgimisë Shqiptare, RH Scholarship ishte kujdesur të sillte për afër për publikun një kronologji filmike me pamje nga Shqipëria. Në mbyllje të mbrëmjes kulturore, performuan violinisti Kristian Gusho dhe këngëtarja Eriola Gusho, si dhe një ekspozitë elegante nga Aurora Paplekaj.
