Sot na goditën në fytyrë të gjithë neve që nuk i nënshtrohemi këtij regjimi – Nga Kim Mehmeti

Sot na goditën në fytyrë të gjithë neve që nuk i nënshtrohemi këtij regjimi – Nga Kim Mehmeti

Në Tiranë u mbajt Samitit i BE-së për Ballkanin Perëndimor. Dhe ata që kanë sy mund të shihnin se liderët evropianë nuk vijnë në Ballkan që të na bëjnë si vetvetja, por që të shohin pse jemi ndryshe nga ata. Pra që të shohim se, për shembull, Shqipëria ka një kryeministër që u jargavitet të huajve, por që është mizor ndaj popullit të vet dhe, që do i jepte jetët tona për t’i mbrojtur të huajt, për dallim nga liderët evropianë që nuk do jepnin asnjë kok të popullit të vet as për qindra koka ballkanase.

Krahas mbajtjes së këtij samiti, në Tiranë u organizuan edhe protestat opozitare që kishin për qëllim të shpalosnin fytyrën e vërtetë të regjimit të ‘Rilindjes’. Thuajse liderët evropian nuk e dinë se cili është kryeministri i Shqipërisë dhe presidenti i Serbisë. Pra thuajse Evropa e mirinformuar nuk e di se njëri e kriminalizoi Shqipërinë e tjetri Serbinë, dhe të dy ata nuk i bashkon ‘Ballkani i Hapur’, por krimi i mbyllur brenda vendeve të tyre.

Dhe duke e ditur këtë, shumë nga liderët evropian besojnë se regjimin e ‘Rilindjes’ nga ai serb e dallon vetëm ajo se atë të Tiranës e përbëjnë hajdutë paqedashës, e atë të Beogradit hajna luftënxitës. Dhe si të tillë, ata s’kanë si mos jenë bashkëpunues mes veti, madje edhe shumë ‘properëndimorë’ dhe në një mendje lidhur me të ardhmen e Kosovës. Siç nuk kanë si mos jenë të dëgjueshëm e ‘konstruktivë’ ndaj Brukselit.    

Ndërkohë, para se të niste protesta e opozitës, u përgjak fytyra e liderit opozitar. Pra e goditën kryetarin e PD-së, me çka na goditën në fytyrë të gjithë neve që e kritikojmë këtë regjim. Dhe ky grusht që përgjaku fytyrën e mendimit kritik, së bashku me shpërthimet që rrënojnë hotelet e kundërshtarëve politikë të këtij regjimi, na e përcjellin kanosjen e kryeministrit të Shqipërisë se ashtu siç e mposhti Shqipërinë dhe popullin shqiptar, do na mposht edhe të gjithë neve që nuk i nënshtrohemi.

Sa shumë gabon dhe sa çmendurak që është!

Sidoqoftë Samiti mbaroi. Morën fund edhe protestat e opozitës. Dhe ata që kishin sy mund të shihnin pse Shqipëria nuk mund të bëhet si e gjithë Evropa; sepse ka burrështetas që janë ‘properëndimorë’, por që nuk janë aspak proshqiptarë. Dhe se për dallim nga kryeministri i Shqipërisë që si palaço u gjunjëzohet burrështetasve të huaj, liderët evropian i ‘jargaviten’ vetëm popullit të vet që i voton. 

Por duke qenë Shqipëria vend i ‘spektakleve’ dhe debateve televizive, edhe ky Samit mbase nuk do sjellë asgjë me shumë se sa intervista të shumta të kryeministrit të Shqipërisë dhe  grindje publike mes të paguarve të ‘pavarur’ për ta mbuluar të vërtetën se sa më jargavitës bëhet kryeministri i Shqipërisë ndaj të huajve, aq më i egër bëhet mëmëdheu ndaj shqiptarëve. Pra që mos shihet se Shqipëria nuk bëhet si e gjithë Evropa ngaqë atë e drejtojnë burrështetas që janë shumë ‘properëndimorë’, por aspak pro shqiptarë.

administrator

Related Articles