By Fotini Allteni Kokeri është nderuar më 29 gusht në Tampa Bay, Florida, për kontributin e saj në komunitet, angazhimin profesional dhe veprimtarinë e vazhdueshme humanitare.
Në ceremoninë e organizuar nga Tampa Bay Area Chiefs of Police Foundation, Kokeri mori çmimin “Business Partner of the Year”, një vlerësim që i shtohet listës së mirënjohjeve që ajo ka marrë gjatë viteve për aktivitetin e saj profesional dhe filantropik. Në fjalën e saj gjatë ceremonisë, ajo iu referua vlerësimit si “Businesswoman of the Year Award”.
“Jam e nderuar dhe mirënjohëse për këtë çmim”, u shpreh Kokeri, duke falënderuar drejtuesit e fondacionit, shefat e policisë, oficerët dhe profesionistët e zbatimit të ligjit për shërbimin dhe angazhimin e tyre në mbrojtje të komunitetit.
Krenare për rrënjët shqiptare
Për Kokerin, ceremonia nuk ishte vetëm një moment vlerësimi profesional, por edhe një mundësi për të shprehur publikisht krenarinë për identitetin dhe komunitetin e saj shqiptar.
“Si shqiptaro-amerikane, jam e rrethuar nga kaq shumë familje shqiptare të mrekullueshme që e kanë bërë Tampa Bay shtëpinë e tyre dhe ne jemi krenarë ta quajmë Tampa Bay shtëpinë tonë”, tha ajo.
Fotini Allteni Kokeri është prej vitesh e angazhuar në iniciativa filantropike në Shtetet e Bashkuara, duke ruajtur njëkohësisht lidhje të forta me komunitetin shqiptaro-amerikan. Ajo është trustee e Kosloski Family Foundation dhe Michael J. Kosloski Foundation, fondacione që mbështesin iniciativa në fusha të ndryshme, përfshirë shëndetësinë, arsimin dhe ruajtjen e trashëgimisë kulturore.
Një rrugëtim i vlerësuar edhe nga komuniteti shqiptaro-amerikan
Kontributi i saj është vlerësuar edhe më herët. Në vitin 2025, American Albanian Law Enforcement Association (AALEA) i akordoi çmimin kombëtar “Two Flags, One Heart”, në vlerësim të punës së saj në mbështetje të spitaleve, personave në nevojë dhe komunitetit shqiptar.
Nga mbështetja për shëndetësinë dhe arsimin te promovimi i kulturës dhe trashëgimisë shqiptare në diasporë, Kokeri e ka kthyer filantropinë në një pjesë të rëndësishme të rrugëtimit të saj në Shtetet e Bashkuara.
Mesazhi që ajo përcolli në mbrëmjen e 29 gushtit përmblodhi edhe filozofinë që qëndron pas këtij angazhimi:
“Suksesi nuk ka të bëjë vetëm me atë që arrijmë, por edhe me atë që i japim komunitetit dhe njerëzit që ngremë me vete gjatë rrugës.”
Vlerësimi në Tampa Bay shënon kështu një tjetër moment të rëndësishëm për Fotini Allteni Kokerin — një shqiptaro-amerikane që ka ndërtuar rrugëtimin e saj në Shtetet e Bashkuara duke ndërthurur suksesin profesional me filantropinë dhe duke ruajtur të fortë lidhjen me rrënjët dhe komunitetin shqiptar.
