Në ditën kombëtare të Rinisë hap siparin Programi “Mentoria”

Në ditën kombëtare të Rinisë hap siparin Programi “Mentoria”

Një nga qëllimet e Diaspora për Shqipërinë e Lirë, është të nxisë dhe mbështesë shkëmbimin e njohurive dhe eksperiencave midis profesionistëve të Diasporës dhe Shqipërisë. Ajo çka e bashkon visarin e anëtarëve të lëvizjes tonë është raporti i tyre i ngushtë me vendlindjen si dhe dëshira e madhe për të dhenë një kontribut për Shqipërinë. Duke u nisur nga kjo ndjenjë, lindi motivimi dhe ideja e programit “Mentoria”, si platformë e shkëmbimit dhe ndarjes së eksperiencave profesionale midis profesionistëve të rinj në Diasporë dhe studentëve / studenteve në Shqiperi. Sipas Herodotit, Mentorët ishin një fis ilir Liburnian që jetonte në bredgetin Adriatik. Ndërkaq vendbanimin e tyre me emrin Mentoria e përmend edhe filozofi e mësuesi i madh Aristoteli. Kjo është arsyeja pse ky program mentorimi bart emrin “Mentoria”.
Një rol kyç në përballjen e sfidave si dhe në suksesin tonë akademik dhe profesional jashtë Shqipërisë kanë luajtur padyshim dhe udhërrëfyesit apo mentorët tanë, të cilat / cilët me këshillat dhe rrjetin e tyre na kanë ndihmuar dhe kanë lehtësuar rrugëtimet tona individuale. Të qënurit të mentoruar në vendet ku jetojmë dhe lidhja e ngushtë me Shqiperinë, ku shumë prej nesh kanë kryer një pjesë të studimeve, na ngarkon me përgjegjësinë dhe motivimin për ti vënë njohuritë tona në dobi të të rinjve shqiptarë. Ne besojmë se mentorimi është një raport dykahësh.
Për këtë arsye jemi të bindur, se të gjithë do të mësojmë dhe përfitojmë nga shkëmbimi i ndërsjelltë me njeri-tjetrin.Shtatë pika kyçe për të sjellë në vëmendjen tuaj:
1) Kush mund të aplikojë? Studentët e universitetit të nivelit Master/Doktoraturë dhe profesionistet e rinj në vitet e para të karrierës së tyre profesionale;
2) Kriteret për të aplikuar? Mjafton një dëshirë e mire dhe motivimi për tu përmiresuar dhe investuar në rritjen profesionale e personale.
3) Afati kohor? Afati për aplikim nis nga sot dhe mbyllet me datë 23 Dhjetor 2021. Të interesuarit janë të lutur të aplikojne nëpërmjet faqes sonë në web: www.takonjementor.com, ku gjendet detaje mbi atë cfarë ne ofrojmë.
4) Ekspertiza e mentorëve tanë përfshin fushat: ekonomi, biznes, teknologji, psikologji, inxhinieri telekomunikacioni, shkenca politike dhe energjitike.
5) Për çdo pyetje dhe paqartësi në lidhje me pritshmëritë e programit, ju ftojmë të na kontaktoni përpara aplikimit nën adresën e emailit: mentoria@diasporaofalbania.com. Dikush nga ekipi do tju përgjigjet brenda 3 ditëve nga marrja e emailit tuaj.
6) Me të gjithë të përzgjedhurit për mentorim do të zhvillohet një webinar, për të dhënë më shumë detaje mbi strukturen dhe pritshmëritë e programit si dhe për tju pergjigjur pyetjeve apo paqartësive para lansimit zyrtar të programit në fillim të Janarit 2022.
7) Programi “Mentoria” është projektuar si fillim për 6 muaj. Ne fund të 6 mujorit, ekipi organizativ do të mblidhet për të vlerësuar (i) impaktin e bërë (ii) interesin e treguar dhe (iii) mundesitë e skuadrës së mentoruesve për të vazhduar kontributin e tyre vullnetar. Në varësi të këtyre treguesve do të percaktohet strategjia në vijim.Ju ftojmë të aplikoni për programin “Mentoria”dhe mezi presim të bashkëpunojmë së bashku e të mësojme prej njeri-tjetrit.
Me mirënjohje,
Ekipi i Programit “Mentoria”

administrator

Related Articles