Kristian Gusho, violinisti i ri shqiptar në Kanada

Kristian Gusho, violinisti i ri shqiptar në Kanada

U desh që të kthehej “liria” post-covidiane që të gjithë të dilnin në rrugë për t”u ritakuar. Kristian Gusho e shfrytëzoi momentin e tij duke krijuar atmosferë muzikore në parqet më të frekuentuara të Torontos. Bashkë me stinën, rikthimin në realitet, Kristiani mblodhi shumë shpejt fansat e tij të parë kanadezë.
Kristian Gusho është violinist dhe producent i ri në moshë, dhe ndër banorët më të rinj të Kanadasë, i cili ka ardhur nga Shqipëria një viti e gjysmë. E veçanta e Kristianit është se ka nisur aktivitetin e tij sapo ka arritur në këtë shtet.
Ai shprehet se edukimin si muzikant e ka nisur që prej moshës 5 vjeçare në Shkollën Artistike “Naim Frashëri” në qytetin e Vlorës. “Ka qenë Flora Caci, mësuesja ime e parë, e cila më ka vendosur duart në violinë!”-shprehet ai. Më tej shkollimi i tij ka vazhduar në Liceun Artistik “Jordan Misja “ në Tiranë, ku studimet në violinë morën trajtën profesionale duke iu përkushtuar dhe dedikuar seriozisht deri në mbarimin e gjimnazit nga ku ka fituar edhe një bursë të plotë për të studiuar në konservatorin e mirënjohur grek “Helenic Conservatory” në Athinë . “Mbrojta e diplomës përpara një jurie me shtetësi të ndryshme në konservatorin grek më dha mundësinë e një Medaljeje të Artë, e cila për herë të fundit i ishte dhënë Leonidhas Kavakos, violinisti grek me famë botërore!”

Në fakt emigrimi i tij në Kanada përkon me pandeminë globale ku pothuaj aktivitetet kulturore kanë qenë të pamunduar por kjo nuk i ka ndalur hovin për të gjetur veten. Situata nuk ka qenë shumë në favorin tim sa i përket muzikës, pasi shumë ngjarje të planifikuara më parë janë anuluar.
Edhe për komunitetin shqiptar të vendosur në Toronto ka mundur të tegojë më të mirat e tij duke  bërë një paraqitje tek festa shqiptare për Ditën e Grave dhe Ditën e Mësuesit më 8 Mars në një  organizim nga RH Scholarship me drejtuesen e saj Teuta Haxhillari. Ishte një përvojë shumë e bukur dhe publiku shqiptar i Torontos më ka pritur shumë mirë. E veçanta e kësaj mbrëmjeje ishte se aty performova së bashku më bashkëshorten time, e cila është gjithashtu këngëtare, Eriolën”- rrëfen Kristiani.
Kristiani është në proces të integrimit të tij në Kanada. Ai shprehet se: “Nuk e kam parë shumë të vështirë këtë pjesë pasi jam mësuar me jetën jashtë Shqipërisë! Puna ime përpara se të vija në Kanada ka qenë në “Cruise Ship” në të cilën performoja për pushuesit e saj nëpër botë! Mund të them që Kanadaja nuk ka qenë sfidë aq e madhe sa kam dëgjuar, por thjeshtë një punë e vogël me veten për një adaptim sa më natyral! Pres shumë gjëra të bukura në jetën dhe karrierën time këtu në Kanada!”
Kristiani tregon se krahas violinës, kompozimi ka qenë pasioni ose dashuria e tij e dytë. “Kam patur shumë dyshime në vetvete nëse kam qenë i aftë mjaftueshëm për t’u quajtur kompozitor ose producent, duke qenë se nuk e kam shkollën të atillë, por vullneti dhe pasioni gjithmonë më ka shtyrë të krijoj muzikë të re bazuar në ndjenjat dhe situatat që kam kaluar ato momente, dhe kjo mund të them që më ka bërë deri diku të suksesshëm duke arritur popullaritet dhe pëlqyeshmëri nga publiku, jo vetëm shqiptar”. Ai me krenari thotë se përpjektet e tij nuk kanë mbaruar, sepse “tashmë po krijoj lidhje edhe me këngëtarë që i kam njohur në Toronto, si shqiptarë ashtu edhe të huaj!”

editor

Related Articles

Leave a Reply

Your email address will not be published. Required fields are marked *