Ish-paqëruejtësja kanadeze një takim miqësor me ambasadorin e Kosovës në Kanada

Ish-paqëruejtësja kanadeze një takim miqësor me ambasadorin e Kosovës në Kanada


Nga
Shani Pnishi
Ka disa vite që ish-ushtarja kanadeze Sophie Boisvert Levesque, e cila në vitin 1999 kishte shërbyer në Kosovë, në rrjetet sociale tregon dashurinë që ka për Kosovën, ku ka fituar shumë miq dhe dashamirë shqiptarë në Kanada, dhe jo vetëm. Ajo dje u prit edhe nga ambasadori i Republikës së Kosovës në Ottawa, z. Adriatik Kryeziu, një takim që Sophie e kishte paralajmëruar para disa kohësh. Në njoftimin publik nga ambasada ndër të tjera thuhet: “Sot, në një bashkëbisedim shumë emocionues mbi të kaluarën, të tashmen dhe të ardhmen e kanadezes znj. Sophie Boisvert Lévesque, për dhe lidhur me Republikën e Kosovës. Znj. Levesque gjatë vitit 1999, ka shërbyer në kuadër të trupave paqeruajtëse të NATO/KFORT-it në rajonin e Drenicës, përkatësisht në qytetin e Drenasit dhe tashmë si veterane e ushtrisë kanadeze flet me nostalgji e admirim për kohën e kaluar në Kosovë dhe lidhjen e veçantë që ka krijuar me popullin shqiptarë”.


Znj. Levesques para një viti ka publikuar edhe një libër për Kosovën titulluar “The Country that stolen my heart” (Vendi që ma mori zemrën time), dhe që nga dalja në dritë e botimit të këtij libri, paratë e shitjes së tij i dedikohen familjeve në nevojë në Kosovë. “Ajo ndjehet shumë e lumtur për progresin dhe zhvillimin e vendit tonë, të cilin kishte arritur ta përjetonte edhe nga afër, për se paku 10 ditë gjatë vizitës që i kishte bërë Kosovës së fundmi (2019). Vlerësohet fakti se znj. Levesque krahas me miq e nivele tjera në Kosovë, vazhdon lidhjet e saj të afërta edhe me shoqatat e komunitetit të diasporës në Kanada, angazhohet fuqishëm në shpërndarjen e së vërtetës së historisë tonë të lavdishme, kudo në Kanada, dhe gjithsesi duke sjellë në vëmendje për ne shumë ide dhe forma kreative të bashkëpunimit, me qëllim ngritjen e urave të bashkëpunimit mes popullit Kanadez dhe atij të Kosovës”- vazhdon më tutje njoftimi i ambasadës.

Sophie kishte qenë pjesë e ushtrisë kanadeze në kuadër të trupave të NATO-s që çliruan Kosovën, dhe kishte shërbyer në komunën e Drenasit në Kosovën Qendrore për gjashtë muajt e parë të lirisë. Gjatë shërbimit në Kosovë, ushtarja kanadeze lidhet emocionalisht me vendasit, dhe është shquar për lidhjet e saj sidomos me familjet që kishin fëmijë, duke ndihmuar në ringritjen ekonomike dhe shpirtërore të tyre. Ajo në vitin 2019 i ka ritakuar fëmijët dhe familjet e tyre që u kishte ndihmuar pas luftës.

Në një status të mëhershëm në profilin e saj në Facebook Sophie ka paralajmeruar edhe nismën tjetër të saj “në lidhje me shtimin e Kosovës në listën e punëtorëve të përkohshëm. Kjo do të thotë që punëtorët mund të vijnë këtu gjatë periudhave me nevoja më të larta, si vera, për 3-4 muaj dhe të jetojnë me ato para gjatë gjithë vitit. Këtu në ndërtimtari ata bëjnë të paktën 15-20 dollarë në orë. Unë jam e lumtur t’ju them se bisedimet midis të dy vendeve për këtë çështje kanë filluar para se të godiste COVID-19,  dhe do të rifillojnë kur të kthehemi në normalitet”, që do t’ishte një nismë e duhur për uljen e papunësisë në Kosovë.

administrator

Related Articles