INTERVISTA/ Eriona Xhaferaj hedh në treg dy linja kozmetike, receta organike bukurie për një jetë të shëndetshme

INTERVISTA/ Eriona Xhaferaj hedh në treg dy linja kozmetike, receta organike bukurie për një jetë të shëndetshme

Eriona Xhaferaj, farmacistja dhe nutricionistja shqiptare është gati të ndajë më ndjekësit e saj një sërë “thesaresh” që ka zbuluar përgjatë rrugëtimit të saj akademik si farmaciste, formuluese kremrash dhe si eksperte në të ushqyerit e shëndetshëm. Ishte 25 vjeç ku është bërë vet sipërmarrëse dhe hapi biznesin e saj, të cilit i vuri emrin “Sekretet e Natyrës” me qëllimin t’i rikthente në treg produktet natyrale të cilat ishin mbizotëruar nga produktet sintetike. E apasionuar që në fëmijëri dhe me dëshirën e madhe për t’u ardhur në ndihmë njerëzve që kanë probleme me lëkuren, vajza nga Tirana, falë angazhimit të saj ka arritur të jetë themeluese e dy markave të kozmetikës, “Sekretet e Natyres.” dhe “greenager.ca” në Kanada.
Suksesin e saj, ia dha vulën e parë çmimi prestigjioz ndërkombëtar “Aspirational Global Woman Award 2020” në platformën “Global Woman” prej së cilës Eriona tashmë gëzon një trofe.

Duke ndarë herë pas here këshilla të vlefshme, Eriona tregon se çfarë do të thotë të jetosh shëndetshëm, por edhe ka arritur ta praktikoj këtë mënyrë jetese në dobi të vetes dhe familjes. Ky rrugëtim ka qenë një kthesë rrënjësore për të, një ndryshim total prej 180 gradësh në mënyrën e perceptimit të gjërave.
E ftuar në Albanian Montreal Press, Eriona na tregon sesi u njoh ajo me shkakun e disa problemeve shëndetësore që s’i kish vënë re më parë, rrugëtimin për të dëgjuar zërin e trupit si dhe përmbushja e misionit që i ka vënë vetes: promovimit të brandit tim të ri “Greenager”, që të ndryshoj jetët e të tjerëve, duke i mësuar ata të jetojnë shëndetshëm dhe ta ruajnë freskinë nëpërmjet thesarit që gjendet në lëkurën e tyre”.

Eriona, na trego me tëpër për rrugëtimin tënd të deritanishëm?
Rrugëtimi im në vija të përgjithshme është kalimi nga banaku i farmacisë në banakun e laboratorit, dhe nga banaku i laboratorit në banakun e gatimit shëndetshëm. Nëse do ndaleshim me hollësishëm, në 2011 kam përfunduar Masterin për Farmaci në Universitetin e Mjekësisë-Tiranë, më pas kam vazhduar një master italian të nivelit të dytë për Farmaci Spitalore dhe Territoriale nga Unversiteti  Camerinos. Nga tema ime e masterit të dytë lindi ideja që njohuritë e farmacisë ti përdorja për ta sjell natyrën në produkte kozmetike. Në 2014 themelova markën time të parë “Sekretet e Natyrës” ku solla formulat e mia autentike në fushën e kozmetikës me përbërës totalisht natyral. Padyshim që ky kapercim kishte nevojë për njohuri të vazhdueshme. Nga instituti, Formula Botanika në Mbretërinë e Bashkuar kam kryer disa kurse online rreth përgatitjeve kozmetike organike. Gjithashtu kam marrë trajnime në “Estetikën e Fytyrës”, dhe kurse të tjera në Aromaterapi dhe Parfumeri Natyrale. Të gjitha këto, për të prekur dhe u thelluar në çdo aspekt që kozmetika përfshinte që nga përzgjedhja e përbërësve, formulimi e deri tek trajtimi dhe aplikimi në fytyrë. Ndërsa mendova se e kisha prekur këtë cikël të plotë, kuptova që shumë probleme me lëkurën e kishin origjinën nga mënyra si ushqeheshim. Kjo gjë më bëri të vendos të vazhdojë studimet përsëri dhe këtë herë në nutricionizëm dhe nga ku përfundova në Vancouver, Canada. Me kryerjen e kësaj shkolle, me lindi ideja e përmbledhjes së bukurisë nën sloganin “Your Beauty From Inside-Out”, nga ku lindi dhe marka e dyte “Greenager”.

Çfarë të frymëzoi për linjën e produkteve?
Të lije banakun e farmacisë dhe të nisje një iniciative sikurse unë bëra, kërkonte një guxim të madh që shumë në ato kohë e quajnë dhe “budallallëk”. Por brenda meje shpërtheu një “thirrje” që përgjigja ishte vetëm PO. Tema që unë mbrojta masterin në Itali, ishte në lidhje me disa përbërës shumë të përdorur në kozmetiken industriale që shkaktonin probleme në shëndetin e njeriut. Ky ishte vetëm një ngacmim që më bëri mua ti shikoja gjërat në një kënd totalisht ndryshe. Sfidova veten, por Zoti përveçse më dha atë forcën e pamposhtur të brendshme, më dha më shumë sukses që neë eksperimentimet e mia të para, për të më treguar që kjo ishte rruga ime. Sfidat kanë qenë të shumta, të llojllojshme, shpeshherë dhe që më kanë gjunjëzuar, por falenderoj Zotin që gjithmonë më ka dhënë besimin që të vazhdoja përpara.

Cila është këshilla jote për vajzat që kanë zgjedhur linjën tënde për të ruajtur bukurinë?
Bukuria e femrës është një prestigj, por nuk duhet ta përdorim atë thjesht të na japi atë kënaqesinë e të qenurit e bukur, por ta kuptojmë thellë që të kujdesemi për veten është respekti minimal që duhet të kemi ndaj vetes. Nga këtu ka lindur ideja ime që po punojë për të ndërtuar Akademinë “I am Greenager” që do të thotë: Une jam e Shëndetshme dhe e Bukur, pra një bukuri e plotë në të gjitha dimesionet, në pamje, në shëndet, e patjeter edhe bukuria në shpirt.

A mund të ndash me ne disa nga sekretet e natyrës që të kanë ndihmuar në formulat e tua?
Natyra na intrigon dhe na krijohet ajo ideja që ka në vetvete sekrete të vështira. Në fakt mjafton të përqëndrohesh në madhështinë sesi është krijuar ajo, të përdorësh njohuritë që mëson në shkollë dhe do arrish të prekësh në fakt xhevahiret e saj, qoftë edhe duke thithur oksigjenin e saj. Në fushën e kozmetikës padyshim që njohuritë e farmacisë kanë qenë shtylla që unë mund të kuptoja më lehtë gjuhën e natyrës, por mendoj që çdo profesion e gjen veten në natyrë dhe frymëzohet nga krijimi i saj.

Mendon se është këmbëngulja jote për të arritur këtu apo të ka dhënë shance edhe Kanadaja?
Momentet e mia më të bukura në Kanada kanë qenë momentet kur kryeja studimet, ato momentet ku fillova të mblidhja copat e puzzle-t që më mungonin në pyetjet të ndryshme që unë kisha vazhdimisht. Pjesa tjetër, ka qenë një sfidë e vërtetë e sidomos dëmet e shumta që Covid-19 solli. Edhe pse “Greenager” lindi pikërisht në periudhën e Covidit në Kanada, edhe pse unë fitova çmimin Aspirational Global Ëomen 2020 në Covid në Kanada, gjithë atributin e sukseseve të mia ia drejtoj vec Zotit. Mund të them që Kanadaja më ka sfiduar pafund, sfida që do doja shumë që një ditë të mund t’i gdhendja në një libër.

Të vjen keq që ke lënë pas dore profesionin e farmacistes për tu marrë me formulimin e produkteve kozmetike?
Aspak, mendoj që unë jam duke e ushtruar këtë profesion në një formë tjetër, në versionin që unë realisht e ndjej që po i ndihmojë njerëzit të jenë të shëndetshëm natyralisht dhe jo me medikamente nëse mund t”i shmangin.

Bisedoi: Blerina Ruka

editor

Related Articles

Leave a Reply

Your email address will not be published. Required fields are marked *