INTERVISTA/ Buzëqeshja perfekte e ka një sekret “OraSmile”. Flet stomatologia Anila Hasko Kurti

INTERVISTA/ Buzëqeshja perfekte e ka një sekret “OraSmile”. Flet stomatologia Anila Hasko Kurti

Jemi njohur me Anila Hasko Kurtin. Një grua e bukur në të gjitha dimensionet, këmbëngulëse, frymëzuese dhe e suksesshme. Anila prej shumë vitesh është pedagoge pranë kolegjit anglez “John Abbott”, ku u jep mësim studentëve kanadezë mbi kulturën e mirëmbajtjes së higjienës së gojës. Ajo ka një të kaluar si stomatologe në Tiranë dhe nuk ka humbur aspak kohë as në Montreal të Quebec për t’i thelluar studimet jo vetëm në stomatologji, por edhe në higjienën dentare. Me sfida të mëdha, por mjaft e qartë për të realizuar një karrierë, Anila mes të tjerash na rrëfen pasionin e saj për të qenë pjesë vitale si në shoqëri, në auditor, por edhe në familje.

Anila, na prezanto pak veten, integrimi në jetën kanadeze
Unë kam ardhur në Montreal në vitin 1998 së bashku me bashkëshortin dhe djalin e madh, që ishte 7 vjeç, ndërsa djali im i dytë ka lindur një muaj pasi kishim mbërritur në Quebec.  Prej 23 vitesh jetojmë po këtu. Si të gjithë kur kemi ardhur këtu, kemi hasur vështirësi të ndryshme. Pas përfundimit të procedurave të dokumenteve, kërkoja më ҁdo kusht ta ruaja profesionin tim që kisha punuar në Tiranë si stomatologe prej vitit 1992. Midis  sfidave të shumta që shoqërojnë integrimin në një shoqëri të re, mbaj mend që kisha jo pak probleme me gjuhën. Por keto sfida, as ato që lidhen me faktin qe kisha dy fëmijë në moshë të vogël, nuk më penguan që të vazhdoja studimet në kolegjin anglez “John Abbott” dhe të diplomohesha në vitin 2002 në programin e higjienës dentare (Dental Hygiene). Mendoj se këmbëngulja më ndihmoi të tejkaloja synimin tim: që prej vitit 2008, jap mësim në kolegjin ku kam përfunduar studimet. Dëshira për të thelluar njohuritë pedagogjike më orientoi drejt masterit në pedagogji për nivelin kolegjial në programin “Performa”, program i akredituar pranë Universitetit të Sherbrook. Në kolegj jap lëndën e farmakologjisë, radiologjisë, terapisë stomatologjike dhe lëndë të tjera.  Këto njohuri të bashkuara me pasionin për profesionin më bëjnë që të ndjej që jap kontributin tim në shoqërinë pritëse.  Njohuritë e mia, të gjitha vështirësitë apo sfidat dhe si arrita t’i kapërcej me optimizëm.

Dy fjalë më shumë për klinikën “OraSmile”
Në shtator 2020, provinca e Quebec-ut aprovoi ligjin për pavarësinë e higjienistëve dentare.
“OraSmile” është një klinikë e pavarur e higjienës dentare, e para që është hapur në Montreal dhe në provincën e Quebec-ut në Nëntor 2020. Unë nuk kisha informacion që ishte hapur një klinikë e tillë, derisa Mireille Barbora, pronarja e klinikës, që sot njëkohësisht është kolegia dhe mikesha ime, më kontaktoi dhe më ofroi të punoja atje. Flasim për një klinikë jo vetëm të konceptuar sipas standardeve klinike, por që ofron edhe shërbime cilësore, një ambient familjar, i rehatshëm, pa stres, të ofruara nga dy higjeniste dentare me një eksperiencë prej më shumë së 50 vjetësh së bashku.

Për cilat arsye vijnë më shumë pacientët tuaj?
Njerëzit vijnë për të patur një higjienë sa më të mirë për gojën, shëndeti i së cilës është i lidhur mjaft ngushtë edhe me shëndetin e trupit; një pacient që ka tendencë të ketë sëmundje të mishrave të dhëmbëve dhe vuan nga diabeti atëhere rreziku për të humbër dhëmbët është më i madh, po ashtu edhe përkeqësimi i diabetit. Studimet klinike kanë treguar që ekziston një lidhje të ngushtë midis paradonotzave (sëmundjeve të mishrave të dhëmbëve) dhe sëmundjeve kardiovaskulare.
Klientët vijnë edhe për zbardhimet e dhëmbëve, ka edhe nga ata që kërkojnë këshillim për lënien e duhanit. Ne ofrojme edhe protektorë të dhëmbëve për fëmijët dhe për të rriturit që luajnë sport, “athletic mouth guards”, “oral cancer screening” (kontrolli për kancerin e gojës). Jemi të specializuar për të identifikuar tharjen e gojës si pasojë e përdorimit të medikamenteve të ndryshme, sidomos ato të tensionit të lartë.

Kur jeni ndjerë e vlerësuar plotësisht nga profesioni që keni zgjedhur?
Ndihem shumë mirë kur studentët më falenderojnë për modelin për të cilin ata ndjekin. Kur punoj në klinikën private “OraSmile”, pacientët më falenderojnë për profesionin, mënyrën e komunikimit me ta, për informacionin që iu jap mbi mirëmbajtjen e higjienës së gojës dhe për këtë ndihem krenare. Gjithmonë jap maksimumin që pacientët të ndihen të kënaqur dhe të rikthehen sërish te klinika jonë.

Së fundmi ju jeni afruar edhe me produktet kozmetike “Arbonne”, si është marrëdhënia juaj me të bukurën?
Prej tetorit të kaluar, jam afruar me “Arbonne”, pasi kalova nje periudhë testi tek vetja, u binda se janë produkte me cilësi dhe fillova t’ua këshilloj edhe të njohurve, duke u bërë kështu konsulente e pavarur. Kam krijuar një strukturë klientësh të cilët po ashtu besojnë sa unë për cilësinë e produkteve dhe e theksoj që janë të gjitha natyrore. Kjo është një tjetër sfidë e pranuar e imja dhe më pëlqen gjithashtu kur të tjerët ndihen të bukur, të vlerësuar, të kuruar.

Bisedoi: Blerina Ruka

administrator

Related Articles

Leave a Reply

Your email address will not be published. Required fields are marked *