By 
Windsor, Ontario – Komuniteti shqiptar në Windsor shënoi një tjetër sukses të rëndësishëm kulturor me pjesëmarrjen në Albanian Village, pjesë e festivalit multikulturor Carousel of the Nations, i vlerësuar si festivali më i mirë në Ontario për tre vite radhazi.
Për të dytin vit me radhë, Shoqata Shqiptare e Windsorit mori pjesë në këtë ngjarje të rëndësishme, duke promovuar kulturën, traditat, gastronominë dhe vlerat shqiptare përpara mijëra vizitorëve nga komunitete të ndryshme etnike. Gjatë tri ditëve të festivalit, rreth 3,000 vizitorë frekuentuan Albanian Village, duke shijuar nga afër elementët më përfaqësues të trashëgimisë shqiptare.
Ky organizim u bë i mundur falë angazhimit të jashtëzakonshëm të komunitetit shqiptar në Windsor. Një rol të veçantë në realizimin e aktivitetit pati presidenti i Shoqatës Shqiptare të Windsorit, Uran Kuçi, së bashku me anëtarët e bordit drejtues dhe mbi 100 vullnetarë, të cilët kontribuuan me përkushtim për ta kthyer Albanian Village në një nga destinacionet më të vizituara të festivalit.
Suksesi i aktivitetit u mbështet gjithashtu nga rreth 30 biznese shqiptare lokale, media komunitare dhe partnerë të shumtë, të cilët ndihmuan në promovimin dhe realizimin e kësaj nisme që synon ruajtjen dhe promovimin e identitetit kulturor shqiptar në Kanada.
Pjesë e aktivitetit ishte edhe Konsullata e Përgjithshme e Republikës së Kosovës në Toronto, e cila riafirmoi mbështetjen e saj për nismat që forcojnë identitetin kombëtar dhe promovojnë kontributin e komunitetit shqiptar në shoqërinë kanadeze.
Përmes muzikës, valleve, traditave dhe mikpritjes shqiptare, Albanian Village dëshmoi edhe një herë se komuniteti shqiptar në Kanada vazhdon të jetë një urë e fortë lidhëse mes trashëgimisë kombëtare dhe shoqërisë multikulturore kanadeze.
