By Nuk është e pazakontë që në rrjetet sociale të hasësh video të individëve të ndryshëm, të cilët kanë veshur mantelin e “messiah-s”.
Vetëpropozohen të të mësojnë si të jetosh, hash, pish, të biesh në peshë, çfarë të lexosh, si të argëtohesh, arrish suksesin e menjëhershëm, të pajtohesh me burrin ose anasjelltas, të rrisësh fëmijët, të mposhtësh ankthin dhe depresionin.
Me kokën sa gjithë ekrani, me zë metalik a monoton deri në vdekje, me poza aktrimi shoqëruar me muzikë, me video të fëmijëve të tyre (krejtësisht të pa tuteluar e pa privatësi), mirëseerdhët në cirk!
Lajtmotivi: “Ti mund të arrish gjithçka! Mjafton ta duash dhe të përpiqesh.”
(Sa cliché është kjo?! Sa shterpë dhe sa e pavërtetë! Por kjo është temë tjetër.)
Pra këto zonja dhe zotërinj janë njëkohësisht motivational speaker, ekspertë finance dhe marketingu dixhital, psikologë, psikoterapistë, hipnoterapistë, nutricionistë, trajnerë fitness-i, ekspertë shëndeti publik, këshillues martese, këshillues prindërimi, shkrimtarë bestsellerash, themelues “akademish”. ?
(Ndjesë nëse kam harruar diçka.)
Mendojeni pak!
Sa e leverdisshme do ishte sikur të kishim afër dikë që e ka një zgjidhje për çdo problem, dikë që ndërhyn fiks aty ku kemi nevojë!
Pse jo edhe ta paguajmë për këshillat e vyera.
Mirëpo kush i ka dy pare mend, e di që kjo është thjesht e pamundur, pasi empatia, dëshira për të ndihmuar, shkathtësia, e mbi të gjitha lavdërimi i vetes, nuk janë ekuivalente me profesionalizmin.
Pretendimi i “gjithëdijes” është absurd dhe qesharak.
Formula që dikush ka përdorur për t’ia dalë në jetë, nuk aplikohet dot tek të gjithë njëlloj.
Për të mos folur për dëmin që mund të shkaktojë dikush që nuk ka asnjë kualifikim për të trajtuar mirëushqyerjen, problemet e shëndetit fizik apo mendor.
Palé pastaj të paguash për këtë!
Jemi në kushtet e deluzionit.
Epoka xy.com; unedhevetemune.com; meezgjuara.com; merrunimemua.com është një tregues se ku ka arritur pandemia e narçisizmit.
Kjo kohë prodhon në masë individë “autentikë” mirëpo 1 autentik+1 autentik+n…autentikë = një luzmë e lodhshme që s’ka në vetvete asnjë identitet a introspeksion.
2 tik tok më tej, të njejtat fraza apo video janë thënë e bërë nga të tjerë “motivational speakers” në perëndim.
Mbeten kopje të kopjeve të kopjeve.
E ndërsa hapësira është e lirë për këdo, rritet vetvetiu përgjegjësia për të treguar kujdes se kujt i japim mundësi të hyjë apo ndikojë në ditën tonë.
Pikërisht sepse shumica janë prezentë në rrjetet sociale, kërkoni në rrethin tuaj profesionistë të vërtetë. Këta të fundit i kanë dedikuar vite të çmuara studimit dhe përmirësimit të shërbimit.
Dikush që ka një hall serioz nuk duhet të bjerë në rrjetën e “mirëbërësve, çudibërësve, mrekullibërësve”.
Dhe kjo është sa përgjegjësi individuale, aq edhe kolektive.
