Tre reforma bëjnë një lavatrice – Nga Nador Bakalli

Unë besoj se Shqipëria tashmë po kthehet në një lavatriçe të madhe të pastrimit te parave. Jo se nuk ka qenë më përpara dhe, papritur e pa pandehur filloi tani, por mendoj se tashmë pastrimi është strategji qeveritare e mirfilltë, e mirëmenduar dhe e aplikuar pothajse haptazi.
Tre reforma e shprehin qarte:
1. Pasaporta e Artë, ose thënë ndryshe, qytetari nëpërmjet investimeve.
Rilindasit do na thonë se një strategji të tillë e kanë ose e kanë patur edhe vende të tjera, madje edhe të zhvilluara si Kanadaja. Po, është e vërtetë, por ka një ndryshim të madh. Vendet e zhvilluara e përdorin ofertën e rezidencës nëpërmjet investimit për të thithur investime nga njerëz të pasur, si pjesë e vetëdijes së vendit mbi lakmueshmërinë e tij. Me pak fjalë Spanja, apo Bahamasi shfrytëzojnë dëshirën e investitorit kundrejt mundësisë që i ofron vendi i zhvilluar. Tani, çfarë dëshire mund të ketë një i huaj pasanik për të lënë nënshtetësinë e tij në këmbim të shqiptares? Dhe ta paguajë me para madje. Përgjigja është e thjeshtë: Kjo iniciativë është rrugëkalimi më i thjeshtë për të gjithë zullumqarët e dynjasë për të rifilluar jetën nëpërmjet një vendi ku njerëzit me shumë emra dhe identitete kanë hyrë edhe në parlament dhe kanë dominuar instancat më të larta të vendit. Nga pikëpamja e këtij tipi investitori, Shqipëria e rilindjes është një parajsë e vërtetë. Identiteti i ri, fillim i ri, rrumpallhane totale dhe dominim i krimit. Madje ajo ofron drejtpërsëdrejti nënshtetësi, as rezidencë jo (si vendet e tjera). E theksoj, nënshtetësi!
2. Amnistia fiskale
Rilindasit do thonë e ka bërë së paku 2 here Italia në 15 vitet e fundit. Po, e vërtetë. E kanë bërë. Por a e dinë adhuruesit se me sa protesta janë pritur dhe sa problematike kanë qenë amnistitë në vendin fqinj? A e dinë se amnistitë e tilla, edhe për vendet më të zhvilluara përbëjnë rrezik të lartë jo vetëm për konkurencën në ekonomi por edhe për depërtimin e parasë së pisët dhe krimit? Në cilin vend keni parë limit prej 2 milion Eurosh për amnisti individuale? Kush na qenka ky që paska 2 milion Euro të pastra nën jastëk?
3. Bastet.
“Tumori”, “mortja e madhe” që kish kapluar vendin tonë deri në vitin 2018, do të shprehej Kryeministri, ky shpëtimtar i madh i shqiptarëve nga veset e tyre! Rrena e radhës sigurisht, që e hëngrën dhe e hanë kallup mjeranët që i besuan atëherë dhe vazhdojnë i besojnë edhe sot! Dy tre batuta bajate dhe rikthehen bastet si pa të keq! Ndërkohë, dihet fare mirë se industria e lojrave të fatit është një nga kanalet më të sigurta të depërtimit dhe pastrimit të parave të pista.Ja pra ku jemi sot, te dashur rilindas, me baste, me amnisti dhe me qytetari të blerë. Me gjithë këshillat prej amvise të zonjës Ministre, nuk ka gradacion të lavatrices që e merr përsipër fshehjen e shpëlarjes masive të parave që kemi përpara syve.
P.S. Ka dhe nga ata që thonë se nuk është ide e keqe që paratë e pista të pastrohen dhe të futen në ekonomi. Zakonisht, të tillët janë ata të cilët të vetmen klasë ekonomie në të cilën kanë shkelur ndonjëherë është Wikipedia.