Dy fjalë mbi politikën e jashtme dhe rrezikun rus. – Nga Nador Bakalli

.Federata Ruse, për arsye që dihen, ka spostuar vëmendjen me një ashpërsi të jashtëzakonshme tek prezenca ushtarake perendimore në Europën lindore. Ukraina tashmë ndodhet në prag të mësymjes ushtarake. Hapi i radhës i Rusisë ishte ai ku iu kërkua NATO-s që të largojë të gjithë prezencën ushtarake (trupa dhe logjistikë) nga dy vende të BE-së si Rumania dhe Bullgaria.
Zërat diplomatike flasin se radhën e ka Estonia, Polonia, e kështu me radhë e gjithë Europa lindore. Rusia tashmë po tregon dhëmbët dhe nuk ka ndërmend të ndalet. Kjo është luftë për influencë dhe territor ekonomik, politik dhe diplomatik. Ukraina thjeshtë mund ta pësojë më keq se të tjerët por Rusia e ka oreksin të madh dhe kërkon të kafshojë me larg!
Po Shqipërinë cfarë e pret?
E pret vllazërimi me Serbinë nën suazat e nismës Ballkani i Hapur! Kjo nismë do të eliminojë kufijtë, do heqë cdo barrierë burokratike për shkembimet tregtare dhe finaciare dhe do liberalizojë krejtësisht tregun e punës midis dy vendeve. Të gjithë ata që e shohin Ballkanin e Hapur si një mundësi për rritje ekonomike dhe asgjë më tepër, i ftoj të hedhin sytë përtej frëngjisë së ngushtë të grafikëve, shifrave dhe statistikave. Para së gjithash, Ballkani i Hapur ka për ta ekspozuar Shqipërinë politikisht ndaj satelitit dhe birit shpirtëror të Rusisë në Europë, Serbisë.
Në kushtet kur diplomacia Amerikane në Shqipëri ndodhet në një nga pikat më të ulëta të pranueshmërisë nga qytetarët (për arësye që dihen), ne vendosim të hapim sa gjatë gjerë kanatat e dritares për influencën ruse. Rusia do të ketë dorë të lirë të depërtojë ashpër me investime dhe influencë, nën ombrellën e Serbisë dhe Ballkanit të Hapur.
Këtë shembull e ka ndjekur suskesshëm Kina në disa vende të vogla në Paqësorin e Jugut, ku influenca amerikane është zhbërë nëpërmjet investimeve agresive.Xhirot nëpër parqet e dëfrimit me luft’anije dhe fotografitë tek karrigia e kapitenit nuk do na bëjnë derman po depërtuan thellë rusët me “dollaro”. P.S. Ah, se desh harrova, Rusia ka dhe Kinën me vete!