By Ottawa- Kanada
Pas një periudhe pauze disa-vjeçare, Mirsa Kërqeli rikthehet në skenë. “Djaloshi im” ishte hiti i cili e bëri të prekë majat e suksesit ku ende dëgjohen më shumë nostalgji nga fansat e saj. Talenti dhe zëri i saj e bënë atë mjaft popullore për publikun shqiptar.
E vendosur në Ottawa të Kanadasë prej 7 vitesh, Mirsa pat vendosur përkohësisht “të flerë“ profesionin e saj, duke qenë më e përkushtuar ndaj familjes, bashkëshortit e fëmijëve.
Por duket se viti 2022 do të shënojë rikthimin e saj për të mos u larguar më nga skena dhe adhuruesit e muzikës së saj. Disa cover-a, videoklie dhe këngë të reja, janë projektet më të reja që Mirsa ka vendosur t ‘ua prezantojë publikut.
Në një intervistë për Albanian Montreal Press, Mirsa Kërqeli do të na tregojë më tepër shkëputjen e përkohshme nga muzika, familjen si dhe rikthimin në tregun muzikor.
Prej 7 vitesh jetoni në Kanada. Si është jeta në Amerikën e Veriut?
Jeta në Kanada është mjaft ndryshe nga ajo e Kosovës, prandaj ishte shumë e vështirë përshtatja me jetën këtu, mirëpo është një vend që premton shumë dhe me mjaft perspektivë, sidomos për fëmijët. Ndryshe nga fillimet në Kanada, sot mendoj se kam bërë një zgjedhje të mirë që jam vendosur këtu.
Jeta e re familjare zë një vend të konderueshëm në ditën tënde, por në fakt si është të jesh edhe nënë, edhe të dish të ruash karrierën?
Jam mjaft e lidhur më familjen dhe sigurisht që ata janë baza për gjithçka. Fëmijët dhe bashkëshorti më kanë përmbushur jetën në një tjetër dimension të panjohur më parë edhe se karriera dhe familja janë dy kahje të kundërta. Për artistet femra është shumë e vështirë mbajtja e karrierës dhe nuk është e padëgjuar të shkëputemi për një kohë nga projektet muzikore. Edhe pse mund të jetë e vështirë, sot mendoj se jam në gjendje t’i menaxhoj të dyja me të njëjtën dashuri e përkushtim.
Pas një periudhe të gjatë shkëputjeje, keni realizuar disa cover-a në bashkëpunime, si është rikthimi?
Cover’at ishin një bashkëpunim me këngëtarin nga Gjilani Butrint Rashiti, të cilat i kemi punuar gjatë kohës kur isha me pushime në Kosovë. Patjetër që rikthimet janë emocionuese, kam punuar shumë fort dhe me disa gjetje specifike për cover-at, isha në mezipritje për t’u njohur edhe me vlerësimin e fansave.
Mirsa, sapo jeni rikthyer me disa projekte pas një pauze të gjatë. Cilat janë planet e reja muzikore?
Vitin e kaluar kam lancuar dy këngë me videoklipe, ndërsa këtë muaj kam publikuar një baladë gjithashtu e shoqëruar me videoklip. Pritja dhe ngrohtësia nga fansat dhe mediat shqiptare në përgjithësi, më kanë bërë shumë emotive dhe me kanë dhënë energji për projekte të tjera të reja. Kjo tregon më së miri se duhet të punojë më shumë tash e tutje. Shumë shpejt do fillojë punën për këngën e re dhe videoklipin. Sigurisht që kam edhe projekte të reja në plan por që dua të mbeten surprizë për publikun.
Ju jeni bërë pjesë e tregut muzikor mjaft e re, po sot si duket show-bizz-i shqiptar?
Kam hyr në muzikë në moshën 18 vjeçare. Atë kohë (në vitin 2005) muzika ishte e mbushur me këngëtarë të mirë dhe me super projekte, mirëpo sot është shumë fish më shumë. Sot duhet të punohej nga 4-5 këngë në vit, që të mbetesh në vëmendjen e fansave dhe me të njëjtin hap me industrinë e muzikës. Sot për sot mendoj se është më kompetitive dhe disi më e vështirë. Mbase kjo rrit cilësinë e tregut për të sjellë punë më të kënaqshme për publikun.
Bisedoi: Blerina Ruka
