By Janë dorëzuar në selinë e Partisë Demokratike 4200 firmat e mbledhura nga ish-kryetari Berisha, për mbajtjen e kuvendit. Ish-kryeministri Sali Berisha e quajti ‘Foltoren’ si lëvizjen e dytë më të rëndësishme historike në Shqipëri pas asaj të vitit 1991 që solli pluralizimin politik.
“‘Foltorja’ tronditi Shqipërinë dhe u shndërrua në dritën e tunelit të zi ku ishin zhytur shqiptarët, që rrezatoi fuqishëm në arenën ndërkombëtare, është pas vitit 1991, lëvizja e dytë më e rëndësshme historike. Ju jeni dëshmitar të përpjekjeve djallëzore të narkoqeverisë por edhe aleatëve të saj ta pengojnë me çdo kusht këtë lëvizje, të shkurajojnë demokratët me deklarata absurde, me qëndrime antidemokratike, por që të gjitha dështuan.
Berisha shpjegoi edhe arsyen pse firmat do t’i dorëzohen Palokës.
“Delegatët e Kuvendit Kombëtar firmosën masivisht formularin për të thirrur në ditën e themelimit të PD, Kuvendin, të rithemelimit ose quajeni si të doni, por Kuvendi që do të bëjë Shqipërinë me opozitën më vigane dhe më fitimtare që ka patur ndonjëherë vendi. Në respekt me publikun, për ju, këtu kemi sjellë 4200 formularët e 4200 delegatëve të Kuvendit të PD, nga 1800 që është detyrimi statutor për të thirrur këtë Kuvend. Po pse shkuan kaq shumë? Firmat vazhdojnë. Siç e shihni këtu përpara kemi një shumicë. Jo vetëm të PD por de facto të Shqipërisë. Mos llogaritni atë shumicë me vota të vjedhura atje. Grupi përfaqësues i firmëtarëve ka vendosur që këto formularë historikë të rithemelimit të pluralizimit politik në Shqipëri, t’i depozitojë në selinë e PD, te kryetari i Këshillit Kombëtar të PD, zoti Edi Paloka.
Lideri historik demokrat, Sali Berisha, tha se janë mbledhur firmat për thirrjen e Kuvendit Kombëtar duke respektuar statutin.
“Që firmat mblidhen vetë, e ka të përcaktuar statuti. Ky nen synon shpëtimin inekstremis të partisë. Ai mori një vendim si peng. Kështu që kryetari nuk do pranonte kurrë të thërriste Kuvendin. E gjykuam më mirë që ta thërrasë anëtarësia, sepse mund ta bënte edhe Këshilli Kombëtar. Nisma është 100 përqind statutor. Edhe ju jeni të ftuar të verifikoni te tryeza. Kjo era e re, kjo lëvizje e re është rikthim i transparencës dhe lirisë në PD. Do jenë komisione me tavolina që do bëjnë verifikimin dhe transparencën. Do bëhet një proces shumë i rregullt. Atë që nuk e ka bërë kurrë PD në këto 8 vite. Nëse peng-kryetari do, le të sjellë përfaqësuesin e tij në tryezë për të verifikuar se kush ka firmosur për thirrjen e Kuvendit Kombëtar,” tha Berisha.
“Ai që nuk njeh statutin del nga radhët e partisë. Statuti është kushtetua e PD-së. Kështu që pavarësisht nga deklaratat që janë bërë unë mendoj se çdo demokrat e ftoj të zbatojë statutin e PD, përndryshe zgjedhin rrugën e vetëlargimit”, u shpreh Berisha.
Ai tha se në 12 Dhjetor , PD gdhin e rithemeluar. “Partia Demokratike në 12 Dhjetor gdhin e rithemeluar. Gdhin e fuqishme, në këmbë, do të vazhdojë projektin e saj. Nuk është projekt që përfundon më 11 Dhjetor. Kryetari pa parti në vlerësimin tim duhet të votohet nga anëtarësia e partisë, ndonëse kuvendi ka pushtet absolut për shkarkimin e tij, por këto janë çështje që do zgjidhen gjatë rrugës”, tha Berisha
