By Nga Shani Pnishi
Të martën më 29 qershor, Shoqata e Avokatëve Shqiptaro-Kanadezë në Toronto, do të zhvillojë një seminar me panelistë të ftuar, juristë shqiptarë në Kanada që drejtojnë firmat e tyre ligjore. Këta avokatë ndërmarrës të suksesshëm në Kanada do të ndajnë përvojat e tyre të ndryshme, mësimet, sfidat dhe shpërblimet e të qenurit pronar e një studioje ligjore.
Seminari i quajtur “Kontrolli Total: Çfarë duhet për të shkuar solo” do zhvillohet nëpërmjet platformës “Zoom” në ora 18:00 me orën e Torontos. Ky është seminari i dytë i kësaj shoqate, pas atij për ligjin e emigracionit në Kanada i quajtur “Rruga drejt shtetësisë: Webinar për Ligjin e Emigracionit” (Road to Citizenship: Immigration Law Webinar), i cili u ndoq nga shumë të interesuar për emigrimin në Kanada.
Aktiviteti është i hapur për të gjithë të interesuarit, por është i përshtatur për avokatët që kanë dëshirë të hapin studion e tyre juridike në Kanada.
Panelistja e parë e ftuar është Denisa Mertiri, themeluese e firmës ligjore “Green Earth Law” në Toronto, e cila është e specializuar në ligjin mjedisor dhe komunal. Denisa përdorë ekspertizën e saj ligjore për ta bërë botën më të gjelbër duke punuar me krahinat kanadeze në çështje rregullatore, penale dhe të koorporatave.
Panelisti i dytë është Marin Nati, themelues i studios ligjore në Toronto, “Nati & Caborubias” që merret me çështje penale, ligjin e familjes dhe pasurive të patundshme. Ai paraqitet rregullisht para Gjykatës së Lartë në Ottawa. Ai është dhe një nga drejtuesti e bordit të shoqatës mikpritëse dhe udhëheq procesin e implementimit të së drejtës së votës së Diasporës në Republikën e Shqipërisë pasi ligji u miratua vitin e kaluar.
Panelistja tjetër Hana Marku, sapo ka hapur studion e saj ligjore ne Toronto. Ajo në ligjëratën e saj do të përqëndrohet në ligjin e emigracionit dhe të refugjatëve. Qëllimi i saj është të ndërtojë një firmë për informimin mbi traumën e veçantë te grave dhe personave LGBTQ që ikin nga dhuna ose persekutimi. Hana është gjithashtu një nga themeluesit e “Albanian Active Now”, një hapësirë online për shqiptarët nëpër botë me politikë progresive.
Aktiviteti do të moderohet nga Anisa Arra, e cila drejton firmën ligjore “Arra Law Firm” dhe Shoqatën e Avokatëve Shqiptaro- Kanadezë.
Shoqata që nga themelimi i saj më 2019 ka pasur si qëllim të bashkojë dhe promovojë avokatët shqiptarë me njëri-tjetrin dhe t’i përfaqësojë këta avokatë me një zë të përbashkët, të cilët vijnë nga fusha të ndryshme. Në njoftimin publik të shoqatës ftohen të gjithë ata që kanë pyetje të mëtejshme të kontaktojnë avokatët e mësipërm përmes faqes elektronike të shoqatës: www.acla-sask.com/ontariodirectory ose me email: hello@acla-sask.com, ose ta përcjellin seminarin.
