Mbrëmë patëm kënaqësinë që në Galerinë Ambigu në Montreal ishim pjesë e një mbrëmjeje të veçantë artistike, në ekspozitën e piktorit shqiptar Zekerija Rexhepit, i cili kishte ardhur nga Halifaxi në Montreal për të prezantuar krijimtarinë e tij tê parë të titulluar
“The Symphony of Survival (Simfonia e mbijetesës)”.

Kjo ekspozitë ishte një simfoni e vërtetë arti, një krijimtari e formësuar ndër dekada nga dora e një artisti që ka kapërcyer kufijtë e Europës, për të shtrirë artin e tij në Halifax e pastaj e pastaj edhe në Montreal të Kanadasë.
Ndonëse salla nuk ishte shumë e madhe, prania e artistëve shqiptarë, vizitorëve dhe dashamirësve të artit na bëri të ndiheshim veçanërisht mirë.
Secila prej veprave të tij pasqyronte jo vetëm një realitet personal, por edhe histori e përjetime kolektive. Në pikturat e tij gjetëm tema të fuqishme që prekin pasojat e luftës, pandeminë COVID-19, figurën e gruas, qëndresën dhe mbijetesën.
Pikturat e tij rrëfenin histori përmes një larmie ngjyrash, ku secila ngjyrë dukej sikur kishte zërin, kujtesën dhe emocionin e vet.

Një bukuri të veçantë kësaj mbrëmjeje ia shtoi edhe e bija, Tringa, e cila kishte ardhur enkas nga Toronto për të qenë pranë të atit në këtë ekspozitë. Me zërin e saj të bukur na emocionoi të gjithëve, ndërsa më pas, babë e bijë, ia morën këngës dhe e kthyen këtë takim artistik në një festë të ngrohtë shqiptare, që vazhdoi deri vonë në mbrëmje.
Kjo është një nga ato mbrëmje që mbeten gjatë në kujtesë, sepse na dëshmon edhe një herë se arti nuk njeh kufij, se talenti shqiptar gjen rrugën drejt skenave dhe galerive të botës dhe se krijuesit tanë, kudo që jetojnë, dinë të lënë gjurmë.
Krenarë për artistët tanë, krenarë për vlerat shqiptare që përmes artit kapërcejnë oqeane!
Valbona Ahmeti
Montreal
14. Nëntor 2026



