By 
Një jetë e re, plot ëndrra, talent dhe pasion për artin, është ndërprerë tragjikisht. Rinesa Qeriqi, artistja shqiptaro-kanadeze e njohur me emrin artistik “Rinesancë”, është ndarë nga jeta në moshën 24-vjeçare, pas një beteje me kancerin e trurit.
Lajmi i trishtë është përcjellë nga The Artistè Foundation, e cila ka nderuar kujtimin e artistes së re, duke vlerësuar talentin, krijimtarinë dhe ëndrrat e saj të lëna përgjysmë.
Rinesa ishte këngëtare, autore tekstesh, kompozitore dhe një artiste me interesa të shumanshme, që synonte të ndërtonte të ardhmen e saj edhe në botën e aktrimit.
Ajo ndiqte studimet për Art dhe Dizajn në George Brown College, në Toronto, ndërsa paralelisht zhvillonte pasionin për muzikën dhe forma të tjera të shprehjes artistike.
Nën emrin artistik Rinesancë, ajo kërkonte të ndërtonte identitetin e saj krijues, duke shprehur përmes muzikës ndjenjat, përjetimet dhe botën e saj të brendshme.
Në një moshë kur jeta sapo kishte filluar t’i hapte dyert e mundësive, Rinesa u përball me një sëmundje të rëndë, e cila i ndërpreu rrugëtimin dhe ëndrrat për të ardhmen.
Në mesazhin e saj përkujtimor, The Artistè Foundation shpreh ngushëllimet më të sinqerta për familjen, miqtë dhe të gjithë njerëzit e dashur të Rinesës, duke theksuar se muzika dhe krijimtaria e saj do të mbeten pjesë e trashëgimisë artistike që ajo lë pas.
Albanian Montreal Press (AMPress) i bashkohet mesazheve të ngushëllimit për familjen Qeriqi dhe të afërmit e artistes së re.
Sepse pas çdo talenti të humbur në moshë kaq të re mbeten jo vetëm veprat e krijuara, por edhe ëndrrat që nuk patën kohë të bëheshin realitet.
U prehsh në paqe, Rinesa!
