By 
Verërat shqiptare hyjnë në rrjetin LCBO në Kanada, një moment historik për prodhimin shqiptar
Një arritje e rëndësishme për industrinë shqiptare të verës dhe promovimin e produkteve “Made in Albania” në tregjet ndërkombëtare do të shënohet më 23 korrik 2026, me inaugurimin zyrtar të verërave shqiptare në rrjetin prestigjioz kanadez LCBO (Liquor Control Board of Ontario).
Ceremonia do të zhvillohet në ambientet e LCBO-së, në adresën 3020 Elmcreek Road, Mississauga, Ontario, nga ora 13:00 deri në 18:00, ku Ambasada e Republikës së Shqipërisë në Kanada ka ftuar komunitetin shqiptar, përfaqësues të institucioneve, partnerë dhe miq të Shqipërisë për të festuar këtë moment të veçantë.
Hyrja e verërave shqiptare në një nga rrjetet më të mëdha të shpërndarjes së pijeve alkoolike në Amerikën e Veriut konsiderohet një sukses i rëndësishëm i diplomacisë ekonomike shqiptare dhe i bashkëpunimit mes institucioneve shtetërore, biznesit dhe diasporës.
Si rezultat i këtij angazhimi, verërat e kantinave shqiptare Pelium, Perla dhe Çobo do të jenë tashmë të disponueshme për konsumatorët kanadezë, duke prezantuar në këtë treg traditën, cilësinë dhe identitetin e verës shqiptare.
Ky zhvillim është fryt i punës së nisur gjatë panairit “World of Trade, Tourism and Taste 2025”, i mbajtur në Toronto më 30–31 maj 2025, ku Shqipëria prezantoi produktet e saj përballë importuesve dhe partnerëve ndërkombëtarë.
Në realizimin e kësaj nisme kanë kontribuar Ambasada e Republikës së Shqipërisë në Kanada, Drejtoria e Diplomacisë Ekonomike në Ministrinë për Evropën dhe Punët e Jashtme, Dhoma e Tregtisë dhe Biznesit të Diasporës Shqiptare, partnerë të biznesit, si dhe drejtues të LCBO-së, ndër ta edhe Arqile Karanxha, Drejtor i Operacioneve të Shitjeve të Produkteve.
Një vlerësim i veçantë i kushtohet edhe kontributit të së ndjerës Elisabeta Katiaj, ish-Kryetare e Dhomës së Biznesit të Diasporës Shqiptare, e cila luajti një rol të rëndësishëm në promovimin e produkteve shqiptare dhe në krijimin e urave të bashkëpunimit ekonomik mes Shqipërisë dhe diasporës.
Përtej aspektit tregtar, hyrja e verërave shqiptare në LCBO përfaqëson një mundësi për të prezantuar para publikut kanadez një pjesë të trashëgimisë kulturore dhe bujqësore të Shqipërisë, duke dëshmuar se tradita mijëravjeçare e kultivimit të rrushit dhe prodhimit të verës mund të konkurrojë denjësisht në tregjet ndërkombëtare.
Pas inaugurimit në Mississauga, pritet të organizohet edhe një aktivitet në Otavë, ku do të nderohet kujtimi i Elisabeta Katiaj dhe kontributi i saj në promovimin e produkteve shqiptare në Kanada.
Hyrja e verërave shqiptare në rrjetin LCBO shënon një etapë të re për eksportet shqiptare dhe një arsye krenarie për komunitetin shqiptar në Kanada, duke hapur perspektiva të reja për praninë e produkteve shqiptare në tregun e Amerikës së Veriut.
