By 50 ditë protestë, “Revolucioni i Flamingove” hyn në histori si një nga lëvizjet qytetare më të gjata në Evropë
Shqipëria ka hyrë në listën e vendeve që kanë përjetuar një nga protestat qytetare më të gjata të dekadave të fundit. Ajo që nisi si një reagim ndaj ndërtimeve në zonat e mbrojtura, pas incidentit në Zvërnec ku një qytetar protestues u tërhoq zvarrë nga forcat e rendit, u shndërrua shpejt në një lëvizje mbarëkombëtare.
Brenda pak javësh, protesta u përhap në të gjithë vendin dhe u mbështet edhe nga diaspora shqiptare, me tubime në qytete të ndryshme të botës. Qindra mijëra shqiptarë kërkuan largimin e qeverisë aktuale dhe ndryshimin e klasës politike, duke e kthyer revoltën në një lëvizje me karakter të gjerë qytetar.
Ditën e djeshme u shënuan plot 50 ditë që protestuesit mblidhen çdo mbrëmje para Kryeministrisë. Kërkesat e tyre përfshijnë shfuqizimin e ligjit që lejon ndërtimet në zonat e mbrojtura, anulimin e “Paketës së Maleve”, miratimin e një kodi të ri zgjedhor, kufizimin e mandatit të kryeministrit në dy mandate, si dhe dorëheqjen e qeverisë aktuale, e cila sipas protestuesve duhet të zëvendësohet nga një qeveri teknike me mandat njëvjeçar.
Qëndresa e qytetarëve për një periudhë kaq të gjatë, pa u organizuar nga një parti politike dhe duke e paraqitur veten si një lëvizje në mbrojtje të interesit publik, e ka bërë këtë protestë një rast të veçantë në historinë e protestave shqiptare. Pjesëmarrja e vazhdueshme edhe gjatë temperaturave të larta të verës ka tërhequr vëmendjen e opinionit publik brenda dhe jashtë vendit.
Edhe pse gjatë ditëve të fundit janë regjistruar disa përplasje mes protestuesve dhe policisë pranë Kuvendit, pjesa më e madhe e protestave është zhvilluar në mënyrë paqësore.
Lëvizja, e njohur tashmë si “Revolucioni i Flamingove”, është pasqyruar nga media të ndryshme ndërkombëtare dhe ka tërhequr vëmendjen edhe të turistëve që vizitojnë Shqipërinë, disa prej të cilëve janë bashkuar simbolikisht me protestuesit.
Organizatorët dhe pjesëmarrësit kanë deklaruar se protesta do të vazhdojë deri në realizimin e kërkesave të tyre, duke këmbëngulur se synimi është një ndryshim i thellë politik dhe institucional që, sipas tyre, do t’i japë fund tranzicionit të zgjatur në Shqipëri.
