By 
Toronto, Kanada – Edicioni i pestë i festës tashmë tradicionale “Sofra Tironce” mblodhi shqiptarë nga qytete dhe vende të ndryshme të botës në një mbrëmje të veçantë, ku tradita, muzika, vallja dhe mikpritja tiranase u shkrinë në një atmosferë të paharrueshme.
Aktiviteti, i ideuar dhe organizuar nga profesori dhe koreografi Ramazan Kellezi, bëri bashkë kryeqytetasit shqiptarë dhe miqtë e tyre në një darkë të kuruar artistikisht, duke e kthyer sallën në një copëz të Tiranës së vjetër në zemër të Torontos.
Nën moderimin e Ramazan Këllezit dhe Blerina Rukës, mbrëmja mirëpriti të ftuar të ardhur nga Montreali, New Yorku, Italia dhe Hungaria, duke dëshmuar edhe një herë se diaspora shqiptare mbetet e lidhur fort me traditat dhe kulturën kombëtare.
Atmosfera artistike iu besua mbretëreshës së këngës së Shqipërisë së Mesme, Merita Halili , dhe bashkëshortit të saj, instrumentistit të talentuar Raif Hyseni . Të ardhur nga New Yorku, ata sollën në skenë emocionin dhe autenticitetin e muzikës shqiptare, të shoqëruar nga klarinetisti i talentuar Igli Tuga dhe organisti Erind Emiri.
Gjatë mbrëmjes ra në sy prania e ish-futbollistit të njohur të Tiranës, Indrit Fortuzi.
Nuk mund të mungonte as grupi i parë i valleve shqiptare në Kanada, “Shqiponjat e Vogla”, i cili interpretoi valle nga treva të ndryshme shqiptare nën koreografinë e profesor Ramazan Këllezit. Me kostumet tradicionale dhe interpretimet plot energji, grupi solli në skenë bukurinë dhe larminë e folklorit shqiptar.
Për orë të tëra, këngët dhe meloditë shqiptare mbushën sallën me emocion, nostalgji dhe krenari kombëtare. Merita Halili, Raif Hyseni, Igli Tuga dhe Erind Emiri përcollën një energji të jashtëzakonshme, duke e afruar publikun me shpirtin e muzikës autentike shqiptare më shumë se kurrë.
Një pjesë e rëndësishme e mbrëmjes iu kushtua vlerësimit të figurave që kanë kontribuar në komunitetin shqiptar. Duke qenë se Qeveria e Provincës së Ontarios ka vlerësuar kontributin e grupit artistik “Shqiponjat e Vogla” në ruajtjen dhe promovimin e vlerave kulturore shqiptare, organizatorët ndanë mirënjohje për disa personalitete të spikatura të komunitetit.
Me trofeun e “Sofra Tironce” u nderua veprimtari dhe aktivisti Nador Bakalli , një zë i rëndësishëm i shqiptarëve në Kanada dhe pjesëtar i një prej familjeve më të vjetra tiranase.
Po ashtu u vlerësua Xhemi Agaj për kontributin e tij në promovimin e figurave dhe historive të komunitetit shqiptar përmes platformës Albanian Oda Podcast .
Një mirënjohje e veçantë iu dha edhe klarinetistit Igli Tuga, i cili ka qenë pjesë e “Sofra Tironce” për pesë vite radhazi, duke kontribuar me talentin dhe profesionalizmin e tij artistik.
Ndërsa Bukurie Herri, një emër i respektuar dhe i dashur në komunitetin shqiptar, u nderua për angazhimin dhe kontributin e saj ndër vite.
Publiku pati gjithashtu mundësinë të shijojë një performancë elegante nga balerinët shqiptarë Albjon Gjorllaku dhe Elia Pasha, të cilët sollën në skenë një vals plot finesë dhe klas. Albjon Gjorllaku, një emër i njohur në artin e baletit klasik, vazhdon të përfaqësojë me dinjitet talentin shqiptar në skenat e Europës dhe Amerikës së Veriut.
Edicioni i pestë i “Sofra Tironce” dëshmoi edhe një herë se traditat shqiptare jo vetëm ruhen, por edhe përcillen me krenari nga brezi në brez. Përmes muzikës, vallëzimit, kujtimeve dhe miqësisë, kjo mbrëmje u shndërrua në një festë të identitetit shqiptar dhe një urë që lidh diasporën me rrënjët e saj.
