By Më 13 prill, Shoqata e Shkrimtarëve Shqiptaro-Amerikanë shënoi 25-vjetorin e themelimit të saj me një aktivitet të veçantë, që mblodhi së bashku shkrimtarë, poetë, artistë dhe dashamirës të fjalës së shkruar nga komuniteti shqiptar në Amerikën e Veriut.
Ky jubile i rëndësishëm për letërsinë dhe kulturën shqiptare në diasporë u zhvillua në një atmosferë të ngrohtë dhe plot emocion, duke reflektuar një rrugëtim 25-vjeçar të përkushtuar ndaj ruajtjes dhe promovimit të identitetit kombëtar përmes fjalës artistike. Programi i pasur përfshiu interpretime artistike, fjalime përshëndetëse, si dhe ndarje çmimesh dhe mirënjohjesh për kontributet e vyera ndër vite.
Një mirënjohje e veçantë iu kushtua drejtuesve të shoqatës, Presidentit Adnan Mehmeti dhe Kryetares Dr. Yllka Filipi, të cilët u vlerësuan për përkushtimin, profesionalizmin dhe vizionin e tyre në forcimin dhe zhvillimin e kësaj organizate.
Në këtë përvjetor u nderuan gjithashtu të gjithë ata që kanë qenë pjesë e këtij rrugëtimi, shkrimtarë, mbështetës dhe anëtarë të komunitetit, të cilët me pasion kanë mbajtur gjallë gjuhën dhe letërsinë shqipe përtej kufijve.
Gjatë aktivitetit u ndanë edhe çmime vlerësuese ku nga Montreal u nderua me çmimin “Agim Deshinca” Valbona Ahmeti, e cila shprehet se:- Ky vlerësim për mua është një motivim i madh për të vazhduar rrugën e krijimtarisë dhe për të kontribuar më tej në ruajtjen dhe pasurimin e gjuhës sonë të bukur shqipe.
Aktiviteti i 25-vjetorit nuk ishte vetëm një moment reflektimi mbi të kaluarën, por edhe një premtim për të ardhmen, për të vazhduar me të njëjtin përkushtim në promovimin e letërsisë dhe kulturës shqiptare në diasporë.
Ky përvjetor konfirmoi edhe një herë rolin e rëndësishëm që Shoqata e Shkrimtarëve Shqiptaro-Amerikanë ka luajtur ndër vite si një platformë që bashkon dhe fuqizon zërin e krijuesve shqiptarë në Shtetet e Bashkuara.
