By 
Pas një ceremonie të ngarkuar me emocione, histori frymëzuese dhe performanca të fuqishme artistike, mbrëmja “25@25” vijoi në një atmosferë më të ngrohtë dhe intime, në një cocktail reception të shoqëruar me muzikë live.
Në këtë pjesë të eventit, arti mori një tjetër formë, më të lirë, më të afërt, por po aq të ndjerë. Të ftuarit patën mundësinë të qëndronin, të bashkëbisedonin dhe të reflektonin mbi emocionet e mbrëmjes, ndërsa muzika krijonte një sfond të veçantë që e zgjati përjetimin e këtij eventi unik.
Atmosfera u gjallërua nga performancat e Kristian Gusho, Klea Cani dhe Eriola Gusho, të cilët sollën një ndërthurje elegante mes muzikës instrumentale dhe interpretimit vokal. Kristian Gusho, i njohur për performancat e tij në violinë dhe koncerte recital në Kanada , së bashku me Klea Cani në instrument, krijuan një dimension të rafinuar muzikor, ndërsa Eriola Gusho i dha mbrëmjes ngrohtësi përmes interpretimit të këngëve që preknin emocionalisht publikun.
Ky kombinim krijoi një harmoni të veçantë që mbeti gjatë në kujtesë, duke e bërë fundin e eventit po aq të rëndësishëm sa vetë ceremonia .
Në këtë atmosferë, arti nuk ishte më vetëm performancë, ishte komunikim, lidhje dhe reflektim. Ishte momenti kur njerëzit ndanin përshtypje, rikthenin në mendje historitë e dëgjuara dhe ndjenin më fort përkatësinë ndaj një komuniteti që, edhe larg atdheut, di të qëndrojë i bashkuar.
Afterparty i “25@25” nuk ishte thjesht një mbyllje e eventit, ishte një vazhdim i tij në një tjetër formë, ku muzika u bë ura që lidhi emocionin me përjetimin.
Nga Blerina Ruka/ Albanian Montreal Press
Fotografia: Flamur Ilazi
