By Festimi i Pavarësisë së Kosovës përbën një nga momentet më të rëndësishme të kalendarit kombëtar për shqiptarët kudo në botë. Në diasporë, kjo ditë merr një domethënie edhe më të veçantë, pasi shndërrohet në një simbol të unitetit, ruajtjes së identitetit dhe lidhjes së fortë me atdheun.
Në këtë intervistë, z. Kuçi flet për rëndësinë e kësaj feste për komunitetin shqiptar në Windsor, për aktivitetet e organizuara me këtë rast, për rolin e brezave të rinj dhe për bashkëpunimin me institucionet lokale në Ontario.
Çfarë domethënie ka për komunitetin shqiptar në Windsor festimi i Pavarësisë së Kosovës dhe pse është e rëndësishme ta përkujtojmë këtë datë çdo vit?
Festimi i Pavarësisë së Kosovës ka një domethënie të thellë për komunitetin shqiptar në Windsor, sepse përfaqëson sakrificën e gjeneratave të tëra dhe rrugën e vështirë drejt lirisë. Kjo datë na kujton se identiteti dhe liria jonë nuk erdhën rastësisht, por janë fryt i qëndresës, vuajtjes dhe përkushtimit të popullit shqiptar ndër shekuj.
Një vend të veçantë zë edhe kontributi vendimtar i Ushtrisë Çlirimtare të Kosovës, e cila u bë zëri i lirisë në momentet më të vështira të historisë sonë. Duke e përkujtuar këtë ditë çdo vit, ne nderojmë të kaluarën, forcojmë identitetin tonë dhe ua përcjellim brezave të rinj krenarinë dhe përgjegjësinë për ta ruajtur këtë trashëgimi, kudo që jetojnë.
Çfarë aktivitetesh janë planifikuar për festimet e këtij viti në muajin shkurt dhe çfarë mesazhi synoni t’i përcillni komunitetit përmes tyre?
Muaji shkurt kulmoi më 14 shkurt, me përkujtimin e Pavarësisë së Kosovës përmes një mbrëmjeje festive dinjitoze, të shoqëruar nga një sërë aktivitetesh kulturore dhe artistike. Programi përfshiu këngë dhe valle tradicionale shqiptare, të interpretuara nga këngëtarë të njohur të skenës shqiptare, si dhe nga grupi ynë valltar VATRA, nën udhëheqjen e instruktores profesioniste Joli Paparistos dhe me kontributin organizativ të koordinatorës Mevlude Dullovi si dhe me përkushtimin e dashur të nënave vullnetare.
Pjesëmarrja aktive e fëmijëve dhe të rinjve të komunitetit dëshmoi përkushtimin tonë ndaj ruajtjes dhe përcjelljes së trashëgimisë kulturore shqiptare. Mbrëmja u pasurua gjithashtu me momente përkujtimore kushtuar historisë, sakrificës dhe rrugëtimit të popullit të Kosovës drejt lirisë.
Një kontribut të veçantë artistik dhanë edhe artistë të mirënjohur. Atmosfera u gjallërua nga këngëtari Malsori, ndërsa programi u moderua me profesionalizëm nga Klodiana Vata, e cila njëkohësisht kontribuoi edhe si këngëtare. Kulmi i mbrëmjes ishte performanca e divës së muzikës popullore shqiptare, Merita Halili, e cila solli emocione të forta dhe një ndjenjë të thellë krenarie kombëtare.
Në këtë aktivitet patëm nderin të kemi të ftuar edhe përfaqësues të institucioneve shtetërore, përfshirë deputetin e Parlamentit të Ontarios, Andrew Dowie. Qëllimi ynë ishte krijimi i një atmosfere bashkimi dhe krenarie, ndërsa mesazhi kryesor që dëshirojmë të përcjellim është uniteti: pavarësisht se jetojmë në diasporë, ne mbetemi të lidhur fort me rrënjët tona dhe me njëri-tjetrin.
Si e vlerësoni rolin e komunitetit shqiptar në Windsor në ruajtjen e identitetit kulturor dhe në forcimin e lidhjeve mes brezave?
Komuniteti shqiptar në Windsor luan një rol shumë të rëndësishëm në ruajtjen e identitetit kulturor dhe kombëtar. Përmes aktiviteteve kulturore dhe artistike, veçanërisht përmes grupit valltar VATRA, ne krijojmë hapësira ku gjuha, traditat dhe vlerat shqiptare kultivohen dhe përcillen te brezat e rinj. Përfshirja aktive e fëmijëve dhe të rinjve është thelbësore, sepse forcon lidhjen ndërbreznore dhe krijon një ndjenjë të fortë përkatësie. Një rol të pazëvendësueshëm ka edhe shkolla shqipe, e cila zhvillohet një herë në javë dhe është e pasuruar me libra dhe me abetaren e përbashkët për Kosovën dhe Shqipërinë. Ajo funksionon nën përkujdesjen e mësueses znj. Entela Bilali dhe kontribuon drejtpërdrejt në ruajtjen e gjuhës dhe edukimin kombëtar të fëmijëve.
Po ashtu, shoqata jonë ka krijuar platforma që lidhin nxënësit dhe studentët shqiptarë nga shkollat e mesme, kolegjet dhe universitetet, duke ndihmuar në zhvillimin e tyre arsimor, profesional dhe shoqëror.
Çfarë bashkëpunimesh ka shoqata me institucionet lokale dhe komunitetet e tjera në Ontario?
Shoqata Shqiptare e Windsor-it ka ndërtuar bashkëpunime të qëndrueshme me institucionet lokale dhe përfaqësuesit politikë në të gjitha nivelet, duke përfshirë këshilltarë bashkiakë, deputetë provincialë dhe federalë, kryetarë bashkie dhe drejtues partish.
Në nivel shtetëror, bashkëpunimi përfshin Kryeministrin e Ontarios, Doug Ford, si dhe Kryeministrin e Kanadasë, Mark Carney. Gjithashtu, bashkëpunimi me përfaqësitë diplomatike të Shqipërisë dhe Kosovës karakterizohet nga komunikim i vazhdueshëm dhe mbështetje reciproke. Këto marrëdhënie na mundësojnë organizimin e aktiviteteve më gjithëpërfshirëse dhe më të dukshme, si ngritja e flamurit kombëtar në Bashkinë e Windsor-it dhe pjesëmarrja në aktivitetin multikulturor “Carrousel of Nations”.
Cili është mesazhi juaj për të rinjtë shqiptarë në Kanada?
Mesazhi im për të rinjtë shqiptarë në Kanada është i sinqertë dhe i drejtpërdrejtë: përfshihuni dhe merrni rol aktiv në komunitetin tuaj. Trashëgimia kombëtare është një pasuri e çmuar që na identifikon dhe na bashkon. Duke u angazhuar, ju ndërtoni ura të forta mes së kaluarës dhe së ardhmes. I inkurajoj të rinjtë të krijojnë klube në shkollat ku studiojnë, të organizohen profesionalisht dhe shoqërisht, pa harruar dimensionin patriotik.
Ju jeni forca, energjia dhe shpresa e komunitetit shqiptar, dhe roli juaj është vendimtar për vazhdimësinë e tij.
Bisedoi: Blerina Ruka/ Albanian Montreal Press
