By Në një atmosferë të ngrohtë dhe plot ndjesi artistike, Shoqata Bashkësia Shqiptaro-Kanadeze organizoi në Toronto promovimin e librit më të ri me poezi “Golden Armour” të autores shqiptaro-kanadeze Armenida Qyqja. Ky aktivitet u shndërrua në një mbrëmje të kulturës dhe reflektimit, ku fjala poetike u bë urë lidhëse mes diasporës shqiptare dhe identitetit të saj shpirtëror.
Eventi u moderua me finesë nga Mendi Kabashi, ndërsa në podium morën fjalën personalitete të botës diplomatike dhe kulturore: Ambasadorja e Shqipërisë në Kanada, znj. Artemis Malo, Konsulli i Përgjithshëm i Kosovës në Toronto, z. Kadri Dakaj, Rex Ferati, President i Shoqatës, si dhe anëtarët e bordit Nora Marku dhe Xhemi Agaj. Po ashtu, me fjalë përshëndetëse dhe interpretime poetike kontribuan Ari Romano, Xhovani Gallani, Prof. Mahdi Ganjavi, Elvira Kona, dhe Iva Poshnjari.
Në këtë mbrëmje, pjesëmarrësit patën mundësi të dëgjojnë disa nga poezitë më të ndjera të librit, të cilat ndërthurrin temat e forcës, dashurisë dhe udhëtimit të gruas në kërkim të dritës së brendshme. “Golden Armour” (Armatimi i Artë) është një metaforë e bukur e mbrojtjes shpirtërore që një grua ndërton përmes përvojës, dhimbjes dhe shpresës.
Armenida Qyqja, e lindur në Shqipëri dhe e vendosur prej vitesh në Kanada, është një zë i veçantë i letërsisë bashkëkohore shqiptare. Poezitë e saj janë botuar në disa revista ndërkombëtare dhe janë përfshirë në antologji letrare, duke dëshmuar për një krijimtari që tejkalon kufijtë gjeografikë e gjuhësorë. Përmes “Golden Armour”, ajo i jep zë një brezi të ri autorësh të diasporës që kërkojnë të ruajnë rrënjët duke përqafuar universalen.
Eventi u mbyll me duartrokitje dhe ndjenjën e përbashkët se letërsia mbetet ura më e bukur që lidh zemrat shqiptare kudo në botë.
