By Dhërmiu, një ndër destinacionet më tërheqëse të bregdetit shqiptar, gërsheton natyrën e egër malore me ajrin e pastër dhe panoramat magjepsëse, me ujërat kristal të detit Jon. I mbrojtur në veri nga gadishulli i Karaburunit dhe i rrethuar nga atraksione natyrore si shpella e Piratëve, Gjiri i Gjipesë, Jalë e Himara, fshati ofron një përvojë unike turistike përgjatë gjithë vitit.
Edhe në stinën e dimrit, Dhërmiu mbetet tërheqës me kishat karakteristike, shtëpitë e rikonstruktuara me shije përmes projektit të “100 fshatrave” dhe shtigjet natyrore për adhuruesit e ecjes dhe natyrës.
Vlerat e tij janë vënë re edhe nga mediet ndërkombëtare. Gjatë muajit korrik, prestigjiozja amerikane The New York Times e ka renditur Dhërmiun mes destinacioneve turistike më të mira në botë, duke e vendosur në hartën globale të turizmit.
Plazhi i gjatë mbi një kilometër, me shezlongë dhe gjire shkëmbore të izoluara, e bën Dhërmiun ideal si për pushim, ashtu edhe për argëtim. Në verë, zona gjallërohet nga disa festivale të mëdha muzikore, të cilat tërheqin mijëra vizitorë vendas e të huaj.
Ky vit ka shënuar një fluks të madh pushuesish, duke e forcuar më tej reputacionin e Dhërmiut si një “vatër” të mikpritjes shqiptare dhe një prej perlave të pazëvendësueshme të bregdetit Jonian.
