By Mediumi më i madh amerikan i udhëtimeve “Travel and Tour World” ndalet te destinacionet më të bukura turistike botërore, ku në listën prej 10 destinacionesh, Shqipëria renditet e para.
Sipas “Travel and Tour World”, një vizë për në Mbretërinë e Bashkuar ju jep lirinë për të udhëtuar pa viza përmes Shqipërisë, Malit të Zi, Irlandës, Singaporit dhe shumë shteteve të tjera.
Mediumi botëror i udhëtimeve shkruan se Shqipëria është parajsa e pazbuluar e plazheve të Europës. Edhe pse deri më tani anashkalohej për shkak të fqinjëve të saj me histori në turizëm, ajo ofron gjithçka për ata që kërkojnë plazhe të qeta, vijë bregdetare të mrekullueshme dhe arkitekturë unike osmane.
Pavarësisht nëse po relaksoheni në plazhet e Ksamilit, po ecni në natyrën e bukur të Alpeve Shqiptare apo jeni duke zbuluar Beratin, qytet që është pjesë e Trashëgimisë Botërore të UNESCO-s, bukuritë e Shqipërisë ju presin t’i zbuloni.
Një destinacion tjetër i rëndësishëm që sugjerohet nga mediumi botëror i udhëtimeve “Travel and Tour World” është edhe Parku Kombëtar i Butrintit.
Ndër të tjera, në shkrimin e fundit, “Travel and Tour World” nënvizon se periudhat më të bukura për të vizituar vendin tonë, sidomos për ata që duan aktivitete të ndryshme dhe aventura në plazh, janë nga muaji maj deri në tetor.
