By Kryeministri kanadez Justin Trudeau njoftoi të hënën se është gati të përshkallëzojë luftën tregtare me Presidentin Trump nëse ShBA-ja nuk heq dorë nga taksa 25% për produktet kanadeze.
Trudeau e quajti veprimin e Amerikës kundër Kanadasë “të pajustifikuar” dhe u zotua se nuk do ta lë atë “pa përgjigje”.
Ai tha se nëse tarifat amerikane fillojnë të hënën në mesnatë, Kanadaja do të hakmerret me taksë 25% ndaj importeve amerikane gjithashtu në mesnatë.
“Tarifat tona do të qëndrojnë në fuqi derisa të tërhiqet veprimi tregtar i SHBA-së dhe nëse tarifat e SHBA nuk ndalojnë, ne jemi në diskutime aktive dhe të vazhdueshme me provincat dhe territoret tona për të ndërmarrë disa masa jo tarifore”, tha Trudeau në një deklaratë për media.
Trump u tha gazetarëve në Shtëpinë e Bardhë të hënën se tarifat 25% do të vendoseshin për produktet nga Kanadaja dhe Meksika në mesnatë.
Po ashtu, presidenti amerikan tha se do të ketë gjithashtu një taksë 10% për energjinë kanadeze.
Trump tha se “nuk kishte vend për marrëveshje me Meksikën apo Kanadanë” për shmangien e taksave të larta tregtare.
“Jo, tarifat, e dini, janë të gjitha të vendosura. Ato hyjnë në fuqi nesër”, tha ai të hënën.
Trump pretendon se tarifat janë një mënyrë për t’i detyruar të dyja vendet që të luftojnë më mirë rrjedhën e fentanilit në SHBA dhe të ndalojnë imigracionin e paligjshëm.
Në anën tjetër, Trudeau paralajmëroi se nëse tarifat hyjnë në fuqi, amerikanët do të duhet të mbledhin më shumë para për produktet elementare, të përditshme.
“Amerikanët do të paguajnë më shumë për gjëra ushqimore, gaz dhe potencialisht do të humbasin mijëra vende pune. Tarifat do të prishin një marrëdhënie tregtare tepër të suksesshme”, tha ai.
