By Këtë të shtunë pranë galerisë shqiptare AMBIGU do të celebrohet ardhja e verës me mjaft ritëm e ngjyra. Ka më shumë se një arsye për të qenë pjesëmarrës në një event ku do të prezantohen zhanre të ndryshme arti.
Dy artistë shqiptaro-amerikanë nga New-York do t’i prezantojnë komunitetit shqiptar projektet e tyre kulturore mbi artin pamor dhe atë kinematografik.
Eventi do të hapet me ekspozitën fotografike personale të artistit vizual, Blerti Murataj të titulluar: “Bashkëbisedim Bardhë e Zi”.
Herion Mustafaraj, aktori i përjetësuar në memorien e të gjithëve si “Beni ecën vetë”, do të prezantojë premierën e filmit artistik me metrazh të shkurtër “SHKREPJA”, që me këtë film vjen si skenarist, regjisor e producent.
Me një kast të përgjedhur aktorësh si Bujar Asqeriu, Luzim Zeqja, Ermira Hysaj e Nadia Mançe, “SHKREPJA” do të na udhëtojë në Shqipërinë e para 100 viteve për të na rrëfyer historinë e një fotoje, që nëse atëherë ka patur vlerën e patjetërsueshme, sot fotoja është një shkrepje e zakonshme.
Nën moderimin e Gent Bejkos dhe Flurans Ilia, gjatë mbrëmjes do t’i kushtohen disa minuta homazhit për aktorin Enea Zhegu, “Tomka” që u shua të shtunën në 28 Maj të këtij viti. Post eventi do të vijojë me një festë të vërtetë muzike dhe energjie tipike shqiptare, por jo vetëm.
